【明報專訊】蜘蛛俠都演到第三代，唯一不變是每個彼得．柏加套上面罩一刻，寡言木訥的宅男從此變得多話調皮，埋藏心底的細密想法一下子傾注飛天走壁的行動力，一發不可收拾，像林慧韡在遊戲上線一剎，會自動變成達哥。
因此縱然聲音畫面無問題，卻沒有忽然飈高音或走音，眼前人正經八百：「有多少唔同嘅，我呢個身分平時係好沉思，好耐先會畀一句你，『達哥』係一個要keep住反應勁快的人，好似進入咗另一個狀態咁。」
沒有遊戲機手掣在手，「達哥」變回林慧韡，東拉西扯地聊着，「九唔搭八」之中又隱隱然透着些人生小道理，他說愈厲害的人反差愈大，等於周星馳平日都沒有電影中好笑，真正的林慧韡，內斂又世故：「我好清楚呢個世界有黑暗有光明，但我好希望可以畀人知道點樣脫離呢個黑暗，達哥便是希望盡量畀多點開心別人，我唔想塞負能量畀人。」
收起達哥聲，一本正經地訴說他那個聽起來其實毫不正經的人生目標：「我想導人向善，改變世界。」
改變人思想 才是最重要
改變世界的宏願，要由中學年代說起。
「我老竇囉，好想我讀嗰啲工商管理，喂你記得要幫我寫清楚，我唔係歧視嗰啲工商管理的人。」達爸說讀工商管理好，出路多，又搵到食，什麼師奶個仔畢業當個經理，多輕鬆，年輕達仔偏不賣帳，去思考人生的意義：「有一種感覺係，咦，你高分，就讀醫，醫之後就law，law之後就finance，好似有一個排位喺度；如果我係機械人，上面畀個order，你就執行，但我就認為唔係人類囉，人類就係有自由意志，選擇自己做嘅嘢，你放棄咗，就係人間失格。」
順帶一提，《人間失格》是達仔喜歡的小說，想當年他是文藝青年，考入港大讀中文，因為聽過魯迅棄醫從文的故事﹕「醫生最多救到一百個人一千個人，咁佢就話，改變人思想先係最重要，咁我都希望係，做到一啲貢獻，改變到一些思想。」曾想過畢業後當老師潤物細無聲，但怕自己不夠資格誤人子弟，加上因為太想留長頭髮所以放棄，轉而伙拍兄長組「林氏兄弟」創作影片，成名作《電車男追女記》模擬毒男面對女神的糾結，每幾分鐘的影片會出現人生的抉擇，揀錯可以無限砍掉重練，直到成功約會女神為止，這些機會屬於我的，感動十三億人的平行時空紅到癱瘓了YouTube，還給推上報，還要是《明報》。
要搵到 自己條長坂橋
「達語」有云，人生，一定要搵到自己條長坂橋。他的長坂橋是「表達」這個媒介，終極目標是要改變世界，拍短片是牛刀小試，畢業後加入電視台做PA，望由低學起，員工福利是，每天上班可以一路看《叛逆的魯魯修》一路剪宣傳片，代價卻是返朝早九點放凌晨三點的「非人」人生：「我一畢業時已經係最霉嘅狀態，人工又嚴重低於大學生平均水平。」同是中文系畢業的同學，出來當老師也有兩萬元，他呢？忙到沒時間花錢，最多到飯堂叫燒味飯時加多味變雙併，名副其實「喊出嚟」﹕「我知道我要捱過去，快速走過，怨唔係我優先要做嘅嘢，我係，快速要，擒上去，脫離呢個困局。」
不甘被工作榨乾人生
「你無可能一開始話，喂你奇才嚟㗎，即刻扔五千萬畀你開套荷李活猛片啦，我好明白了解到現實係點樣啦，你好想做你夢寐以求嘅嘢，你必須要付出代價、犧牲，我知道那個是起步點。」到底也捱過了。又要多得那段日子，不甘被工作榨乾人生，堅持放工要打兩鋪機，久而久之搞直播，因為把聲似劉以達，被網民一聲「達哥」叫吓叫吓成了網絡紅人，由自己拍片到為廣告商拍片，由晚晚九點半直播打機到自組遊戲公司出任CEO，今天是「打機都可以有出息」的完美範例。
打機 跟讀書事業無牴觸
屈指一算，由《電車》片推出到今天都差不多九個年頭，達哥也變成了達叔，時移世易，連後知後覺的政府終於知道要趕潮流尾，在預算案中加入推廣電子競技一項，那邊廂《人民日報》接連撰文批手遊《王者榮耀》發放負能量，害母公司騰訊股價蒸發掉一千億之餘，還要負上個荼毒眾生的罪名：「我從來就不覺得打機同讀書事業係牴觸嘅，我打機吖，我咪又入到大學，無影響㗎，運動員係咪代表讀書唔叻？NBA以前湖人嗰個鬍鬚佬加素，讀醫嘅；同埋講真，去到香港地啊，夠有人會鬧你仲踢波唔溫書，係時候準備公開試喇，佢都唔會畀你發展足球啦。」
價值緊要過搵食
唯一看不過眼的是，昨天還說「打機無出息」，今天眾口一致支持發展電競，理據離不開「打機搵到食」，或電競作為產業有發展潛力︰「你話打機搵到食，但去到搵到食之前一段好長好長路其實好坎坷，可能家人都未必理解你，如果唔係因為鍾意，你根本無法堅持落去。好多時係你的堅持，令件事產生了價值。同埋唔能夠一面倒講呢行嘅風光，好似音樂咁，Justin Bieber 搵到食，都有音樂製作人捱麵包，你確定只要做到鍾意嘅嘢就算捱麵包你都okay，咁你就做啦。美斯唔會一開頭話，喂，我搵算命佬算過我踢波可以搵到幾千萬，所以我要靠踢波為生，一開頭都係因為鍾意，咁試吓啦。」
人生規劃 無得用數字量度
達哥話齋，打機可以睇數字：「街霸都有數字睇，你知唔知？好似你睇卡通片咪有啲格數，一格格，呢個動作有幾多格，就代表出拳有幾快。」唯有人生，不要用數字來量度，所以訪問可以談人生規劃，但不談年紀收入，「姜子牙都係八十幾歲先紅，即係唔好太在意呢啲嘢，我盡量都唔想傳達呢啲嘢；一個人考試可以睇分數，感覺上好客觀，將你嘅能力值反映咗出來，但如果樣樣齋睇數字，就好死板，無趣味，好似你講笑話，有無得幾多分幾多秒講呢樣嘢，就一定會有人笑？你無得咁。」
不要後悔，要試
他對人生看法簡單，就是不要後悔：「我盡量唔希望有……想過一個無後悔的人生，例如，好似《求婚大作戰》咁，山下智久無同大臉妹表白，佢後來後悔喇，所以先要番轉頭吖嘛，如果佢當時有試過，但食檸檬做兵嘅，咁就唔係後悔，因為佢試過，後悔就係你連試都未試。」所以他凡事爭取，讀大學時選科，看學系宣傳單張，滿心以為可以申請到中東交流，讀到第三年才發現中伏，單人匹馬上院長辦公室理論，結果獲特事特辦發放獎學金到也門、埃及留學一年，度過了人生中最自由無憂的一段日子：「伊斯蘭啲人好純品，個城又成日停電，無啦啦傾傾吓計，砰，無咗，班友就喺度yeah嗄嗄，傾吓計啊，好鬼寫意，無咩鬥爭，香港就度度都競爭緊。」
想改變 令世界更美好
「咁一個地方總有優點缺點，唔會十全十美，你估伊甸園咩大佬？正如我咁講，都係不斷想進步，我想傳達想改變，令到佢更美好，希望改到啦，但當然全世界都有無力感，都市一定係會有，點解啊？因為有社會階級，啲嘢未必到你控制吖嘛。」陳錦鴻會撲出來問，公平咩？「呢個世界從來無公平的遊戲，你想破壞佢吖嘛，咁你𠵱家有無足夠嘅力量？無嘅時候你就要踏踏實實，都係要行返嗰條路，可能最後你上到去會發現呢個世界其實就係咁，但你要上到去先有資格講呢樣嘢，當你係蟻民階段，無人會聽你講；如果你畀我，我就會忍辱負重去到嗰個位，最尾上到去先一嘢蹺起佢。」類似的對白，陳某筆下的司馬懿有一句：「不如選定最強者，助紂為虐，火速平定天下之後，篡位改政。」但到底仲達後來都成了個見死不救、妥協無底線的半個魔頭﹕「咁我好老實講，三歲定八十，都好難變，個core都係咁上下，唔通好似佐助咁突然癲晒咩。」
絕代雙驕 花無缺
既然是遊戲人生，他的理想角色是大雄，萬大事有叮噹幫手，欣賞《烙印戰士》主角的鬥志，也嚮往夜神月要將世界淨化的崇高理念（但強調不是其方法），還有古龍小說中的花無缺：「你有睇《絕代雙驕》嘛，花無缺就係嗰種人，佢好純品，但佢可以制禦到邪惡，因為佢真係一戙都無得畀人抽秤，永遠都跟住規矩，好君子，所以即使小魚兒好古惑，但永遠都唔夠佢玩。」
開發自家遊戲 吸引世界目光
「我知道呢個世途險惡，但係我都相信有美好一面，一心做好事，好到尾，一樣可以有運行。」無缺公子是富二代，林慧韡則是靠自己一路打併過來，上月他組公司開發自家的手機遊戲，目標是除了本地人玩，也要吸引到世界目光﹕「香港電影、音樂都勁過，但為什麼唯有遊戲沒有自己的代表作？要有心做囉，你有心做，做得唔好，啲人都會支持同原諒，好似諸葛亮，你有心做蜀國，就算最後畀人隊冧咗，人哋都會讚諸葛亮點點點，你無心做，就完全無人會體諒你。」他常說，失敗的話，大不了回去打工：「唔會餓死嘅，你要面對自己想做啲乜嘢，無可能兩全其美㗎啦，好多歌手未紅前，都喺自己屋企彈吓結他啊，周杰倫未紅都係幫吳宗憲寫吓歌啊，都無咩名，人工唔高，一定有呢個階段。」
夢之繼承者 帶畀人快樂
他當然也有人生「卡關」的時刻。有一次他直播玩遊戲《人中之龍：夢之繼承者》，爆機後忽然感性，跟觀眾分享一段黯然往事﹕「好記得一開頭做嘢無耐，捱騾仔時，有一次我生日，約了一個識了十幾年、做護士的朋友飲嘢，我同佢講『你就好啦，得償所願，完成咗你嘅夢想，阿達叔我自己仲好似差好遠，𠵱家都唔知做緊乜』；跟住佢同我講﹕『你錯了，以前我由睇你第一條片已經好開心，得到好多快樂，你的目標是很遠的，你要帶畀好多人快樂，你𠵱家先係開始，我就唔同，做護士，去到呢度，已經肯定了個目標，但你要一路做上去。』」那一刻他將自己與遊戲角色扣連，覺得自己從主角身上繼承了勇氣：「今日大家有緣喺呢度睇咗呢個大結局，希望有一日，阿達叔我都可能完成唔到自己的夢想，或有咩衫長褲短，但也希望你們可以繼承阿達叔的勇氣，可以繼續做落去。」
「個遊戲叫夢之繼承者，上一代完成唔到嘅嘢，就會留畀下一代，我都希望係咁，有啲嘢，如果我達成唔到，我希望我嘅觀眾可以達成到。」他說自己才剛起步，不知道可以走得多遠，但正如他在雜誌的專欄欄目，「半世功名一芥輕」，人生最重要是活着的狀態。
「我鍾意古龍的《流星‧蝴蝶‧劍》，流星、蝴蝶、劍，你覺得呢三樣嘢有咩共通點？就係佢哋唔郁時，就無咗個意義，流星要閃耀，劍要揮舞，蝴蝶要飛，你要生存，就係要活出你嘅意思。」
