有話說﹕「零功課」願景

文章日期:2016年03月29日

【明報專訊】上周吳克儉局長引述上年年尾發出嘅通告,承諾除非學生有特別需要,否則要求學校在大部分情况下,必須讓學生回家「零功課」。承諾歸承諾,做唔做到又係另一回事。一句「零功課」,真係觸動咗唔少家長嘅神經。

剪報找資料 家長一齊「受苦」

Mama身邊唔少朋友都係小學生嘅家長,每次講到功課就真係一把火。𠵱家啲小學生,普遍每日三至八份功課,仲要唔止抄寫計數咁簡單,剪報啦、閱讀報告啦、上網蒐集資料啦,絕對唔係就咁坐定定喺書枱前一兩個鐘就做得完。如果第二日要默書或者小測,連埋溫習分分鐘搞到十一、二點先瞓,第二日又要七點起身返學,聽到都怕。

唔好話小學生,就算係幼稚園生,份功課都有本事做到家長發忟憎,要留意喎,唔係個細路發忟憎,係家長喎。點解?你估小朋友做功課,真係寫幾隻字咁簡單?好多時冇家長協助,佢哋根本係冇可能完成得到,真係苦了學生又苦了爸媽。

到底香港小朋友功課有幾多?Mama問咗有三個囡囡嘅Blogger媽媽Yennie。Yennie大女同二女分別喺津貼小學讀小五、小四,佢話呢間學校已經出名功課少,但都逃唔過每日要做七至八樣功課嘅命運。「佢哋放學之後仲有課外活動,返到屋企都五點幾,食埋飯冲埋涼又開始做功課,唔好話冇時間玩,佢哋根本冇可能喺一個精神奕奕嘅狀態之下做功課,更試過做做吓瞓着。啲功課又深,中文科嘅閱讀理解可以深到連一個大人都唔識答,咁到底為乜?」

「深到連大人都唔識 為乜?」

Yennie話以前我哋一輩係返上下晝班,正好有半晝時間做功課同玩,但係𠵱家大部分小朋友都係返全日,而學校又冇畀機會學生喺lunch後做功課,變相令佢哋用嚟輕鬆玩樂嘅時間大減。「小朋友嘅生活唔應該畀功課佔據晒,佢哋應該有時間放眼世界!我認同功課係要有,例如中文字的確可以透過抄寫去記,但係不至於多到,同深到,連一個小朋友都應付唔嚟!咁樣只會打擊佢哋嘅學習動機。」Mama相信Yennie嘅說話絕對係大部分家長嘅感受,「零功課」雖然係天方夜譚,但希望真係有一日,我哋嘅小朋友唔使再畀功課影響童年生活。

相關字詞﹕每日明報-Happy Pa Ma