有話說﹕K3中文 就要考重組句子?

文章日期:2017年01月17日

【明報專訊】早排立法會舉行公聽會,討論「防止學生自殺委員會」兩個月前發表、有關學童自殺成因嘅報告,Mama有相識嘅家長到場發言,梗係要去撐場啦!席間聽到有小朋友分享,由於功課太多,佢每晚都唔夠時間瞓,講完仲忍唔住喊出嚟。另外有家長話,幼稚園功課已經好多同好深,小朋友未升小學已經覺得好大壓力。

幼園懶理指引 教局無得罰?

聽聞過現今有啲幼稚園仲已經有默書、測驗,Mama一直半信半疑,事關教育局明明有畀指引幼稚園,話唔應該以默寫、測驗、考試嚟評估兒童,照計校方都唔會違背㗎。點知同身邊嘅家長一傾,先知真有其事。陳小姐有個囝囝讀K3,自K2開始就要應付中英測考,中文科要認字,由老師讀出詞語,小朋友喺卷上圈返正確字詞,而英文就主要考拼音。到K3,考試科目包括中、英、數、常識同普通話,好在常識科範圍生活化,普通話則只考口語,相對唔使花太多時間溫;但主科難度高咗,中文要考重組句子,對囝囝嚟講就有啲困難喇。

測考一年得幾次,但K3每周都有默書,呢個星期默中文,下星期默英文,梅花間竹。起初每次只默兩個詞語,之後慢慢加多。K2升K3嘅初期,因為突然要溫默書,囝囝都有啲吃力。以陳小姐所知,同校有啲全職媽媽日日都幫仔女溫書,但佢堅持小朋友要有充足休息,所以冇成日催谷,最多叫囝囝畀多啲心機做功課,希望將字詞記入腦,應付默書;至於考試,佢只喺考前兩星期左右,開始幫囝囝溫中英數,每晚大約45分鐘。

對於幼稚園測考實况,教育局知唔知情呢?Mama即刻發個email去教育局問下。發言人回覆話,局方人員會訪校、視學同觀課,一旦發現幼稚園以默寫、測驗或者考試評估兒童,就會要求校方停止。不過,如果校方無視指引或者拒絕停止,教育局會採取乜行動呢?發言人就冇回答喇!所以家長揀幼稚園前,想知學校係咪真正冇測考,唯有多啲同其他家長互通消息,靠口碑選校啦!

相關字詞﹕每日明報-Happy Pa Ma