【明報專訊】Mama細個嘅年代，長輩成日話「食不言寢不語」，所以每逢開餐，大人細路都一律要「滅聲」，專心食飯，仲好記得老媽子當年嘅口頭禪就係「烏蠅飛過都要聽到」！
唔知係咪童年抑壓得太犀利，搞到Mama𠵱家好鬼鍾意講嘢，尤其食飯，一坐低就停唔到口，同兩個細路天南地北，乜都傾餐飽，有時老公都會笑笑口話Mama「口水多過浪花」。
嗱！嗱！嗱！好彩中文大學替Mama「平反」，根據佢哋最新研究報告指出，「多與父母一起吃晚飯及傾談學校生活的學生，能有較好的學業成績」，你睇Mama幾用心良苦，為仔女好咋！
中大教育數據研究中心早前公布「本港家長與學童閒談、晚飯、及協助功課調查研究」，呢項研究隨機抽樣調查咗1.5萬名本港小三、小六及中三學生，以及1.3萬名家長，希望了解一下家長跟子女閒談、吃晚飯及討論學校生活嘅頻繁程度，再探討呢啲親子舉動，會否對學童學業成績帶來正面影響。調查所得，呢三個級別嘅學生家長，雖然80%至85%幾乎每日都會同子女食晚飯，但當中就只有53%至64%家長係幾乎每日都同子女閒談，有14%至20%嘅家長甚至每周閒談少於一次。
Mama睇完呢份報告，就覺得情况唔係咁理想，亦令我想起一位年輕人。呢位年輕人同Mama講，佢同屋企人零交流，就算一家人食晚飯，都係大家捧住碗飯各自坐一角咁篤手機，食飽放低飯碗就各自入房。如果真係有說話要講，就透過WhatsApp通知對方。年輕人強調，一家人唔係有仇，之不過由細到大，父母都好少同佢哋傾偈，久而久之，長大咗就更加無話題。
親子溝通提高學習動機
唉，親子溝通真係要由細培養啦，Mama鍾意喺飯枱前面傾偈，係因為呢個時候最relax，好多時都係喺呢段時間，八到啲仔女喺學校發生乜嘢事，開心唔開心，佢哋都會講出嚟，乘機宣泄下，怪不得兩個豆丁咁開朗啦。研究報告都係話「父母多與子女閒談、一起吃晚飯，尤其是傾談學校生活，有助子女提高學習動機及減少焦慮」。
究竟父母同子女傾多啲偈，係咪真係好似研究報告講咁令「學生能有較好的學業成績」，Mama唔敢講，但有一樣嘢可以肯定，溝通多啲，了解多啲，關係一定會好啲，尤其呢個年代，讀書壓力咁大，父母真係要多啲關心子女，畀多啲正能量佢哋呀！
