【明報專訊】教育局發出「幼稚園教育課程指引」，明確列出幼稚園不應安排幼兒班學生執筆寫字，低班及高班也不應有機械式抄寫和計算活動，以及不應安排過量、頻密或過於艱深的家課，並於小一的首半個或首個學期設適應期。教育局向來給人印象是「冇牙老虎」，指引並非法例，也無約束力，僅是方向的參考，如果不遵守，當局只會要求改善，走到最極端的一步，亦僅可能失去參加免費幼稚園資格而已。幼稚園如果有心規避，大可陽奉陰違，明知教育局人手短缺，除非有人報寸，否則寫到班細路雙手變咗形都冇人來查喇；又可扮疏忽，萬一有人查課室斷正，人贓並獲，也不是大件事，講聲sorry，教育局官員不外要求改善而已，濕濕碎喇。
莫講話指引，就算是規定，從來無人重視。N年前，幼稚園規定不准教英文，根本無人理，九龍塘好多有規模的幼稚園，英文深到中學生都唔識，因為課本來自英國，花卉和動物的名字僻到冇人有，仲喺九龍塘兵房請幾個洋人做生招牌。報名人龍打蛇餅，好多視學官為自己仔女報名排埋一份。高班學生要計兩個位乘數，你話離唔離譜？規定尚且如此，現在的所謂「指引」，睬你都生癪喇！
王師奶勸過吳克儉海外考察教育歸來，最好公開考察心得，一來可與教育界分享所見所聞，二來可證明本局長風塵僕僕並非志在遊山玩水。小婦人之忠言從未獲局長一顧，但今次「指引」列明不應安排幼兒執筆寫字，卻甚有德國、芬蘭feel，足證局長萬里長風之餘，尚有「一」得，北歐數國之行並非全食白果。
王師奶雖是牛頭角師奶，七八年前已指出德國立法，兒童6歲前不一定要上學，法國小學生不用做功課，間接批評香港幼稚園課程不合理，但言者諄諄，聽者藐藐，仲以為小婦人亂噏。現在官方出「指引」，王師奶應該開心才是，但小婦人心翳如故，預知這「指引」是無煙大炮，得陣風。
幼稚園怕家長定教育局？
王師奶睇淡這「指引」，第一是改壞個名，既云指引，即係講明可跟可唔跟；第二教育局自揭底牌，講明你唔跟我都冇你符，完全無power，跟你都傻喇。學校跟「指引」即係趕客，甲校K1就會寫a到z，中文又會寫山、水、人、刀、尺，乙校乜都唔識，你話香港啲家長揀邊間？學校要生存就要揣摩顧客心意，幼稚園主就算好明白教育原理，但五斗米大過天，有幾多個家長接受到隔籬二叔婆個孫有功課做，自己個𡃁妹只識紮紮跳乜都唔識，要洗家長個腦真係難、難、難；第三是「指引」的推行時辰唔啱，人人都知局長還有三個月就「榮休」，邊個會理最後order吖？唔通吳克儉退休後回來做義工咩！
走筆至此，報章報道申訴專員劉燕卿批評教育局對本地課程造假的情况監管不力，留下「局方的被動程度可謂不作為」評語，作為局長退休賀禮。有咁啱得咁啱，局長又遠赴海南公幹，畫對耳仔埋牆，聽唔到。
作者簡介：不是普通師奶，家中米缸有幾多斤唔知，但對香港教育界有幾多牛鬼蛇神，有幾多「嗚喱單刀」措施，卻一清二楚。「論盡教育」絕不手軟