【明報專訊】Mama發覺身邊嘅人最近好鍾意玩IQ題，大家無端端喺社交網站上載一份「功課」，問你識唔識做。相信唔少人近日都見過兩份所謂「幼稚園功課」，一份係中文拆字遊戲，另一份係動物連線遊戲，睇落題目真係好深，連唔少大學生都話唔識做，仲有好多留言罵爆出呢份功課嘅學校同老師，話佢哋根本喺度玩啲學生同家長。
Mama睇完呢兩份功課，真係好嬲，但嬲嘅原因唔係功課太深，而係對於各位唔知頭唔知路嘅「塘邊鶴」所畀嘅意見非常反感。第一、幾乎冇人問來源嘅真實性，第一個轉載呢份功課嘅網民話係K3功課，大家就覺得係真，完全冇諗過查證，最後先有人走出嚟話呢份可能係小學功課；第二、局外人完全唔知做呢份功課嘅前因後果，例如將兩種相關動物以連線配對嘅功課，大家睇到一頭霧水，但原來只要知道每個動物的英文字母開頭，就會知道點樣做，而呢樣嘢可能正係小朋友近日學緊嘅課程範圍，佢哋又點會唔識做呢！
不了解課程進度 片面批評不當
𠵱家好多人鍾意擺嘢上網「公審」，但唔肯花少少時間去查明真相，引嚟一大班網友齊齊聲討，講到底，都係剝花生。香港中文大學新聞與傳播學院講師梁麗娟（Grace）話，呢個叫「回音谷效應」（echo chamber effect），「回音谷喺網上世界好普遍，只要將一張相、一件事情放上網，就會一呼百應，同聲同氣嘅人會出嚟留言，好似回音一樣。不過，放嘢上網嘅人通常會選擇性咁聽佢想聽嘅說話，對於認同自己嘅留言就全部接收，覺得自己啱晒」。
原來Grace都有留意嗰份中文功課。佢話一般人第一眼睇會覺得好深，但係好多時老師設計呢啲功課，係因為學生之前做過閱讀理解，或者學習咗有關課文，喺其中學咗呢啲字，然後先會做番相關功課去鞏固所學；只不過一畀人放上網，大家就以訛傳訛咁，未曾了解就主觀咁評價，咁樣對學校、老師又是否公平呢？而局外人唔清楚來龍去脈就去批評，又係咪適合呢？
Mama都好同意Grace話，𠵱家成個教育文化裏面，家長嘅權利愈來愈大，單係家教會已經可以向學校畀好多意見。但如果連設計功課都要插手，咁教育工作者嘅角色又係咩呢？奉勸爸媽們，下次將功課擺上網公審前，不如停一停，諗一諗，搵個合適方法同學校溝通，咁係咪對小朋友得益更大呢？
[Happy PaMa 教得樂 131期]
