【明報專訊】復活節啱啱過去，各位爸爸媽媽有冇同小朋友食大餐呢？Mama同一對仔女都食到捧住個肚呀！食好嘢固然係享受，不過有時空肚都好有意義㗎，講緊嘅係香港世界宣明會嘅「饑饉30」活動。
相信好多人都聽過「饑饉30」，甚至參加過兩日一夜嘅饑饉營，體驗30小時唔食嘢嘅滋味，但嚟到第34屆，宣明會決定搞搞新意思，呼籲大家喺今個月之內，透過食少一餐嚟體驗飢餓，再捐出飯錢畀非洲嘅小朋友。
自減一餐 不入營也支持饑饉30
聽到呢個嶄新方式，Mama即刻叫好，因為不限時間地點，隨時隨地響應都得，彈性變得大好多。香港世界宣明會市務總監黃潔儀（Pauline）就分享，呢個正正係改變模式嘅原因，「一向好多人支持饑饉活動，過往營會都有幾千人參加，但全球有8億人欠缺足夠糧食，即係每9個人就有1個要捱餓，需要加快伸出援手，所以想透過新方式，讓更多人參加到饑饉活動，就算冇時間入營，都可以喺屋企、學校、工作地方參與」。
不過，由捱餓超過一日改為食少一餐，難度似乎大減，會唔會令人印象唔夠深刻呢？原來呢個只係輕量級挑戰，想為飢餓兒童做多啲，可以聯同屋企人或者朋友，組成接力挑戰組。喺今個月任何一日開始，同隊友進行饑饉接力，連續30日內，每日至少有一個隊友食少餐，甚至全日唔食嘢，捐出嘅飯錢自然更多，亦可以藉此向身邊人籌款。參加者亦可以感受到，解決饑荒講求持續性，「饑荒係長期嘅問題，唔會話今日入完營，聽日就解決到。要幫助捱餓兒童，就要持續為佢哋出力」。
以前喺饑饉營裏面，參加者可以認識到有關饑荒嘅知識，今年就以展覽嘅方式取代。今個月24至30號，九龍塘又一城商場會舉行「童享每一餐」展覽，透過互動主題展覽、行動回應區等等，將非洲兒童嘅狀况呈現眼前。
宣明會亦鼓勵大家，將「食空氣餐」嘅相片放上網，「所謂空氣餐，即係放啲餐具出嚟，但上面冇食物，將『食空氣，捐飯錢』嘅信息傳揚開去」。Mama最鍾意同囝囡自拍，又有得幫人，真係好想試下！不過喺度都提提大家，12歲以下小朋友想響應今次活動，要先得到家長同意，亦要衡量健康狀况，詳情請參閱宣明會網站（www.worldvision.org.hk/famine30）。
[Happy PaMa 教得樂 134期]
