【明報專訊】雖然話香港重視兩文三語，但普遍家長最關心嘅，仍然係仔女嘅英文，難怪英語班、補習社開到成行成市。Mama身邊有唔少朋友，喺BB得六七個月大、坐都未坐穩時，已經抱佢哋去上英文playgroup；再大小小呢，就讀會話班、拼音班，每個月單係花喺學英文嘅學費都幾揦脷。
Mama並非富貴人家出身，當然無佢哋咁豪，所以向來都係採取自家教學。例如兩個豆丁仲係BB時，Mama就鍾意播住英文兒歌，同佢哋邊唱邊跳舞，順便教啲歌詞生字；當佢哋大少少、牙牙學語時，Mama每日都會撥少少時間做英語時段，用英文同佢哋傾偈、玩遊戲、講圖畫故事，一直維持到兩個細路入小學為止。
在家英語互動 更勝playgroup
好多朋友都笑Mama孤寒，唔肯投資喺仔女身上，但其實除咗慳錢，Mama亦係想建立多啲親子關係啫。好彩Mama嘅苦心終於有人認同。上星期巧遇香港教育大學幼兒教育學系助理教授黃國成博士，佢話如果想小朋友學好英文，確係要趁佢未有母語包袱時就畀佢接觸，但與其一星期只去一兩次playgroup，倒不如父母每日都抽啲時間同佢哋用英語互動，效果肯定仲好。
咁每日抽幾多時間先夠呢？黃博士笑笑口話，最理想係有3個鐘頭，但都知香港父母好忙，所以最低限度係30分鐘，只要呢30分鐘做得優質，就可以逐步提升幼兒嘅英語能力。點為之優質？黃博士就鼓勵家長要做得全面啲，咪只係集中聽兒歌，皆因兒歌最大用處係用嚟誘發小朋友嘅學習動機，以及練發音，但就唔能單靠兒歌嚟學好英文，因為詞彙唔夠豐富，所以家長最好另外設計一啲專係學詞彙嘅遊戲同細路哥一齊玩，例如有口難言、抽字卡等等，令佢哋可以喺唔同渠道，認識多啲生字。
講開自家教學，Mama忽然醒起有個朋友好鍾意喺視頻網站下載啲英文卡通片放喺部手機度，每逢小朋友無聊時就畀佢睇，咁又有冇幫助呢？原來黃博士唔多贊成，一來細路仔唔適宜太早接觸電子產品，會好傷眼；二來電子產品影像太快，畀唔到幼兒想像空間。佢建議家長同仔女多啲睇英文圖書，睇時傾吓講吓，順便訓練埋專注力。黃博士又極力推介家長教小朋友念英詩，佢話好多人都畀「英詩」兩個字嚇親，查實有啲英詩好短、節奏感又好強，係好適合小朋友念㗎！
[Happy PaMa 教得樂 139期]
