【明報專訊】近幾個星期，好多學校紛紛舉行畢業禮，Mama睇新聞先知，小朋友畢業原來好大使費。有幼稚園喺迪士尼樂園搞畢業旅行，又喺高級酒店開謝師宴，夾夾埋埋要用成千蚊。
計Mama話，幾歲嘅豆丁畢業使乜咁奢華，不如畀佢哋做返主角，展現過去幾年所學，咪更有意義！好似上星期，Mama去咗明我幼稚園嘅畢業暨校慶典禮，小朋友上台跳舞、合唱、吹口琴、舞獅等，有機會喺咁多大人面前表演，相信佢哋都好難忘。
典禮自然有校監同嘉賓致辭，香港中文大學校長沈祖堯就係嘉賓之一。難得同幼稚園學生接觸，沈校長花咗唔少工夫預備。點解咁講？事關Mama發現，沈校長特登打咗條米奇老鼠呔！佢話摷咗成半個鐘先搵返條呔出嚟，希望藉此同小朋友拉近距離，認真有心。
突破界限 享受團隊賽笑與淚
不過Mama好好奇，沈校長對大學就熟悉啫，對幼稚園教育又有咩見解呢？佢就分享，年輕人需要自信、抗逆力同團隊精神，應該由細細個開始培育。至於方法，沈校長提倡重視體育，「我早排去澳洲，四周嘅公園有好多著校服嘅人打波、跑步，香港就少見好多喇」。
啟發佢有呢個主張，係因為四個月前嘅大專盃足球賽，「中大足球隊23年來未拎過大專盃冠軍，今年入到決賽，我懷住戰戰兢兢嘅心情去睇足全場」。由於傷患同停賽嚴重，中大隊連一個後備球員都冇，踢到加時階段梗係攰，但球員仍然奮戰至最後一刻，仲憑互射十二碼贏冠軍，「見到佢哋互相激勵，完場時有笑容又有淚水，我明白到運動絕對唔止鍛煉身體，亦對心靈健康好重要」。
佢又以自己為例，上年開始，佢身為大忙人都堅持每日練跑，「不論天氣幾熱幾凍都跑，由起初跑一兩公里就喘氣，到後來跑到10公里以上，可見運動可訓練人去突破界限、克服困難。推動年輕人做運動，一定建立到佢哋嘅抗逆力同自信」。佢仲笑笑口透露，自己一年內減咗35磅，難怪身形fit咗咁多啦！
放手讓孩子跌碰
最後佢提醒Mama，小朋友做運動時可能會受傷，家長最好有心理準備，「我睇大專盃決賽，隔籬有兩個家長，一見阿囝畀人踢就大嗌，我覺得佢哋嘅血壓就快飈到上天」。但其實運動同人生一樣，總要有跌碰先精彩，所以家長都唔使太肉緊。
[Happy PaMa 教得樂 第147期]
