有話說﹕教育中心質素無王管?

文章日期:2017年09月19日

【明報專訊】最近有一條網上片段睇到Mama火都嚟!事緣一個家長拍攝到小朋友到教育中心上堂時,畀個無愛心嘅所謂導師扯衫同篤頭,事後教育中心仲出聲明,話自己只係比其他中心認真、有心同嚴厲。嘩,如果要用咁嘅「嚴厲」做法先叫到小朋友乖乖守規矩,咁呢啲導師真係好極有限。

呢次就話咁好彩家長有機會拍片,大家先至睇到真實情况,但市面上大大小小教育中心多不勝數,更加唔係間間都會畀家長睇到小朋友喺課室裏面嘅上堂情况,導師質素唔通只能夠靠估?就呢個情况,Mama一定要問吓東華學院幼兒教育學系助理教授李麗梅(Frances)。

Frances話,呢啲教育中心嘅導師同正規學校聘請嘅教師最大分別,就係對老師嘅要求各有不同。教育局規定,所有幼稚園教師必須持有「幼兒教育證書」或以上學歷,佢哋都接受過相關培訓同實習;但係教育中心就唔需要,或者有中心會要求導師有一定教育程度,但係其實最終只要負責人覺得適合就可以。原來咁大件事?咁我哋有咩途徑知道幫小朋友揀嘅教育中心,導師有無「嚴厲」對待學生㗎?

Frances話就算家長無機會觀課,都仲有幾個方法去了解導師質素。「第一係睇吓中心有無向教育局註冊,其次係向負責人詢問一下導師背景,了解佢哋係咩教育程度。之後,可以從多方面探聽一下中心嘅質素,例如家長口碑,甚至睇吓放學時導師帶小朋友出嚟嘅時候,態度係點樣。」

Frances都同Mama一樣覺得,無論導師係咩學歷,都唔應該用唔適當嘅手法去教學生。「小朋友的確係需要學規矩,嚴厲係無問題,問題係用乜嘢方法去教。我會覺得導師用堅持嘅態度係好重要,例如小朋友唔肯坐好而要爬上枱,唔使一定要用懲罰嘅方式,只要你堅持話『不可以』,要求小朋友唔好咁做,都係一種教佢哋聽指令嘅方法。對一個小朋友扯衫,唔單止有機會整傷佢,其實都會令到佢內心感覺唔舒服,呢種方式甚至連教導嘅方法都唔稱得上。」各位家長,下次為仔女揀教育中心,記得要細心挑選呀!

[Happy PaMa 教得樂 第156期]

相關字詞﹕每日明報-Happy Pa Ma