【短片:Emily Online】帶未婚妻探陳志雲班 「陳小姐」被曝光 AY難得見慌張

文章日期:2017年1月12日

上回講到形象鬼馬嘅公民黨黨魁楊岳橋(AY),兩星期前成功向拍拖幾年嘅女友「陳小姐」求婚,即將「被私有化」。唔少女粉絲心碎之餘,都好想知道「那個她」係邊個,咁就等Emily下回分解一下。

話說陳志雲今早喺自己facebook,上載咗AY早前去佢舞台劇探班嘅片段,當時AY應該仲未求婚,片中陳志雲即興拉咗AY個女朋友入鏡,AY當時應該都有啲意外,一聽到陳話「咦,呢個係你女朋友呀」嘅時候,佢即忍唔住話「嘩,呢啲唔好上鏡啦」,聽把聲都覺得佢有啲慌張,陳志雲當然唔理佢,一邊拉人一邊話「橫掂都嚟咗,見吓嘛」。

突然被曝光嘅AY女友只能甜笑掩飾怕醜,陳志雲仲即刻主持上身,即時問一問呢對小情侶「係咪話就嚟結婚架?」AY即接口話「永遠都係計劃之中嘅,你要知道」。

陳志雲又問AY女友會否擔心AY多女粉絲,又追問究竟AY求咗婚未,「陳小姐」即刻話我唔知算唔算喎,仲話見到實物先算,AY則搭嘴話「to 求, or not to 求, that is the question」。陳志雲當然唔放過佢哋,鏡頭仲即刻拉近鏡,發現「陳小姐」手上真係無戒指,「陳小姐」笑住話「我未應承架嘛」。

係,當時未,但而家應承咗啦,恭喜晒。