【2013年12月2日明報專訊】無綫雖然被指抄橋製作旅遊節目《三個小生去旅行》，不過三個小生胡楓（修哥）、謝賢（四哥）、Joe Junior最近因為節目出街，再成為觀眾談論對象，大姐大知道有網民將三人年紀加起來總和225歲來開玩笑，取笑他們的密碼是225。
老頑童要求女記者惜一啖
81歲的修哥走在67歲的Joe Junior和77歲謝賢身邊，年紀是最大的一個，但修哥性格風趣、幽默，玩得的程度不遜於另外兩位老友兼拍檔。修哥活到老做到老，平時返無綫開工，都經常跟工作人員開玩笑，遇到記者又會搞笑說﹕「我有料要爆，唔好講人知。」日前他和Joe Junior出活動幫節目宣傳，接受傳媒訪問時，當時大姐大也在場，見修哥應承女記者要求，拿着個錄音筆來收聲，當做完訪問，女記者就請修哥歸還錄音筆，此時修哥興之所致，就開玩笑說﹕「想攞返支錄音筆？惜我哋一啖先！」Joe Junior聞言都玩埋一份﹕「是的、是的，惜我哋一啖先！」女記者被修哥、Joe Junior殺個措手不及，當場尷尬得臉紅。但如何收科呢？最後修哥、Joe Junior打了個折扣給女記者，接受女記者一個愛的抱抱，才完成這次「親善」訪問，認真返老還童。
四哥打招呼﹕乜你仲未死咩？
仲有77歲的四哥，腰骨、身手比同年的人敏捷，全無因年紀愈大而行動減慢，好似他近年被傳媒追問家事，被問到厭，所以每次出席活動，都如濕水欖核「唧來唧去」，想捉他都捉不住。遇着四哥心情好，他有時都會停下來開玩笑，不過手法就跟修哥、Joe Junior截然不同；有次四哥在活動碰上一名相識數十年的資深記者，四哥擺出一臉驚訝問﹕「乜你仲喺度呀，你仲未死咩？」這樣不客氣，可能有人覺得四哥似山草藥「噏得就噏」，其實四哥不拘禮節問候朋友，都是想搞吓笑，輕鬆吓！
