梁小冰今日出席慧妍活動沒有穿著全套制服，自爆遭同場的陳法蓉教訓，令她感到不受尊重。兩位前港姐吵架吸引花生友圍觀，梁小冰當場向記者投訴，她怒氣未消，事後繼續在社交網爆大鑊。
她未開名鬧陳法蓉，只是稱呼對方為「惡女人」，無禮貌、不懂尊重人!轉頭她繼續爆活動上被陳法蓉質問她「玩咁大」!兩人已正面交鋒，她要求對方道歉，又揚言會退出慧妍雅集。她還加了9個嬲嬲豬圖案以表示極嬲怒的心情。
她寫道:「我本來真係好開心出席活動，老公同囝囝仲揸車早成十幾分鐘抵達現場以示尊重。正在同其他在場賓客打招乎之際，就莫名其妙被一個不知所謂的人當眾斥責我無著制服，我呆在當場不懂反應，鬧完我就若無其事行開繼續同其他人好有禮貌握手招呼......我真係好嬲，但我都忍住度氣完成所有儀式合照先走，.....點知在室內臨離開的時候，當時場內無記者，佢衝埋嚟再質問我使唔使玩到咁大！我就當住所有人面前直斥其非，我話，請你檢討同人講嘢嘅語氣態度同禮貌，我依家畀個機會你，你反省過後，我仍然會接受你道歉！但如果你毫無悔意，以後我唔會再出席慧妍雅集所有活動，亦退出唔做會員，因為我唔會畀任何無修養的人再一次傷害自己！」
早前梁小冰在社交網自爆過馬路跟阿嬸衝突，自稱𡃁妹比人恰。今次46歲「𡃁妹」小冰自言被50歲陳法蓉恰，斥對方恃老賣老!
