謝賢怒摑曾江 修哥無辜中招打甩眼鏡 拍《四個小生》積怨 記招大爆發

文章日期:2015年08月13日

【明報專訊】TVB真人騷《四個小生去旅行》變小生的戰場,79歲謝賢(四哥)昨日面對面爆粗數臭80歲曾江兼怒氣出掌。粵語片年代兩大當紅小生半世紀以來的恩怨一掌了斷,四哥向曾江以動作演繹他的金句「兜巴星你埋牆」。83歲的胡楓及時「隔鬥」,四哥一掌只揩到曾江的臉頰,但修哥慘中招眼鏡被打到飛脫。

記者﹕陳釗 攝影﹕梁迺楠

昨日《四個小生去旅行》謝賢(四哥)、曾江、胡楓與Joe Junior出席記者會,大會安排蛋糕為四哥慶祝79歲生日,眾人紛紛祝賀,在台上表現融洽。台下四小生接受訪問,四哥被問及節目中接受不少危險項目挑戰?四哥變得沉默說﹕「我今日講嘢唔好聽,有高層在場,我唔講得。佢哋3個講開心嘢,我就唔開心,但我都捱完返嚟!」問四哥是否很多不滿?他點頭回應,其他3人O嘴好尷尬,說旅程開心打圓場。

等TVB高層離場 4小生齊人開火

四哥冒火獨自坐一旁,記者上前問他前晚有乖孫慶祝生日,他才露笑容。他提到旅程上很多不滿,但不是安排出問題,旅程沒吵架,自己很和氣變忍者。四哥堅持待TVB高層離場後,4個小生齊人才講出整件事。他說﹕「佢哋咁開心,點解有一個唔開心?這是我的感受!」問是否不受尊重?他說﹕「唔係唔尊重我,係唔尊重所有人。」其間TVB總經理鄭善強走近問四哥是否有意見?四哥回應不用客氣,已成事實了。

斥曾江開工坐輪椅 感覺被玩弄

修哥先埋位,四哥跟他咬耳仔,修哥安撫說﹕「你真係傻!」四哥回應﹕「我呢世人未試過咁㷫!」待齊人後四哥便開腔發炮。他說﹕「原本4個小生去旅行係開心事,但其中有一個跛的(指曾江),唔緊要,跛的我哋可以照顧。估唔到開工兩三日佢就要坐輪椅,由頭坐到尾,感覺有啲玩弄我哋。尋日我睇新聞,話你(曾江)流鼻血4個鐘,我X你老X!流4個鐘,你死得未?咁你唔死?」曾江淡定回答﹕「未死得,打一針就停咗!(流鼻血)」

6度爆粗 突然起身撲向曾江

四哥激動在其後的訪問中先後6度爆粗,接着他跟曾江你一言,我一語。四哥說﹕「唔好講呢樣,你坐輪椅嗰度,我X你老X,要我哋成班人輪流推你。」曾江﹕「大佬,你估我想咩!」四哥﹕「我知你好X活躍。」曾江﹕「我拐下拐下好耐,如果我咁好戲就不得了。」四哥﹕「我話你聽,我知道你的為人多過佢哋!」曾江回應說﹕「咁又係!」此時四哥爆粗並突然站起來撲向曾江想摑他。坐中間的修哥彈起擋四哥無辜被打甩眼鏡。而曾江臉頰也被揩過。現場情况混亂,曾江呆了,四哥爆粗質問曾江前日講過什麼?曾江說﹕「咩呀!咩呀!我無講過嘢!」

導火線 嫌四哥配音阻慢進度

由積怨到衝突,相信兩老的導火線是前日他們為節目配音,曾江嫌四哥配音時阻慢進度,說以為可以早返屋企。四哥對記者說﹕「我好耐無錄音,佢XX我喎!仲要喺我後面行嚟行去,導演都叫佢坐低,配音唔可以有聲嘛!」曾江還擊說﹕「有地氈㗎,老四!」

四哥揚言前日已經想打曾江,但不想在無綫打人,他對曾江說﹕「我喺邊度都打得你!」曾江回應﹕「你打我有咩問題,你使乜咁衝動。」修哥做和事老叫他們不要嘈,四哥未罷休,繼續爆粗聲討曾江,他說﹕「總之你以後唔好見到我!」便怒氣轉身走,曾江回應﹕「唔好咪唔好,使乜咁衝動!」

曾江唔介意﹕同佢拗撬不止一兩次

四哥離場後,曾江若無其事歎香檳,接受訪問時表現平靜。他說﹕「大家都有衝動的時候,無問題。我唔開心都會黑口黑面,人之常情。(四哥話你在錄音室嫌他阻收工。)我哋經常互窒,拍攝才真實和過癮,可能佢覺得呢件事窒得佢唔過癮吧!」他覺得不需要致電四哥,自己不會介意。他直言拗撬幾十年來唔止一兩次,今次他覺得四哥衝動些。他否認詐病,強調流鼻血是有醫生紙證明。

幾十年首勸交 修哥﹕唔好打我副眼鏡

修哥鬼馬地重演被打歪眼鏡一幕,他說拍攝時感受不到四哥有不開心,講笑時說過曾江是否詐病?但四哥與曾江都幾好傾還飲紅酒。會否是夾計宣傳?他笑言﹕「我懷疑係喎!搵着我來搞,打我唔緊要,唔好打我副眼鏡嘛!」他笑言除拍戲外,幾十年無勸過交。

相關字詞﹕每日明報-娛樂