話說大姐大由昨日開始不停收到電話，大家打來都問一句：「大姐大，係咪老戲骨演戲呀？好精彩呀！」大姐大笑指各位反應認真奇怪，何解冇人可憐或慰問曾江，而是大家都當一場娛樂性豐富的真人騷來看？
大姐大先不定論《4個小生去旅行》演變成《4個小生要打人》是真是假，不過，要一向好注重形象的四哥，在攝影機面前連串爆粗，仲要畀幫記者們攞住收音咪、做「盡忠職守」收音師的Joe Junior全程收晒粗口，四哥還一路講到口都窒晒，這種氣憤的表情，不是話入戲就即演到，更不會是無綫的酬勞或人情，可令四哥來幫手演大龍鳳！加上，曾江被摑從愕然到有點怯，但又要頂住條火都駁兩句咀，這種反應實在真的假不了！
大姐大要特別一讚4人中年紀最大的修哥（胡楓），原來佢係最淡定、適當時候出手化險為夷，真的是薑愈老愈辣。無論這場鬧交真人騷點收科也好，難得大家睇得咁開心，一定成為今年最爆娛樂新聞。
