【明報專訊】周潤發所到之處都會成為「集郵」目標，昨日大年初二，發哥與發嫂齊以型Look現身銅鑼灣，跟發媽及家人食開年飯。發哥出現酒家大受食客歡迎，開心向他拜年。發哥亦有求必應，發揮自拍神功，令酒家外擠得水泄不通，場面墟冚，要部長幫忙開路，發哥魅力沒法擋。發哥得知《賭城風雲III》票房成績好感開心。
周潤發與太太陳薈蓮昨午12時30分到達銅鑼灣西苑酒家，發哥一身黑色衫、牛仔褲，戴着黑超型爆；發嫂同以黑超及黑色衫，襯到絕。他們見到記者友善企定定拍照，記者向他們拜年，發哥笑笑口說﹕「你點解知我喺度嘅？」之後便進入酒家會合家人，這餐飯食了約兩小時。離開時，發哥手上拿着一袋二袋東西，門外的侍應祝賀他，發哥隨即財神上身大派利市。
發哥揸機自拍 發嫂應邀加入
剛巧門外有一家大細的市民等升降機，見到發哥即興奮大叫﹕「發哥呀！」然後一擁上前圍着他，開心說﹕「我哋全家人買咗20張飛睇《賭城風雲III》呀！」𧨾得發哥笑哈哈說多謝。雖然發哥雙手拿着東西，仍有求必應跟這家人來個大合照，還保持一貫親自揸機自拍作風，帶領眾人﹕「1、2、3，笑！」之後發嫂亦應邀加入一齊影，氣氛歡樂，並互相說恭喜發財。
發媽精神健壯 市民讚發哥好型
發媽穿著紅色衫，雖然要由家人扶着離開，但精神健壯。孝順的發哥按着升降機門，讓家人逐一進入。其間有市民大讚發哥好型，他開心說多謝。發哥出現短短時間已令場面如此墟冚，部長見狀幫忙為他開路。
開心《賭城III》票房成績理想
問發哥《賭城III》票房成績理想？他笑着說﹕「係咩！開心嘅！（會否繼續拍新一集？）睇下點啦！」提到有否留意旺角發生嚴重警民衝突事件？發哥說要看新聞了解。他與發嫂離開時祝記者工作順利、身體健康！
