【明報專訊】陳豪與陳茵媺（Aimee）終於成功追到一個女兒，昨日兩人親自報喜，家中添「小公主」，取名Camilla。陳豪攬實老婆陳茵媺開心惜惜，sweet到爆！兩人已育有兩子陳梓燁（Aiden，2歲）與陳浩鋒（Nathan，1歲），三女Camilla於4月27日（周三）出世。陳茵媺日前秘密入養和醫院生B，前晚公布BB出世了仍神秘未允透露生B仔還是B女。昨午4時半，逾30傳媒在醫院等候，陳豪與陳茵媺手拖手揭曉生了Baby Girl，記者也為他們歡呼；陳豪搞笑問賠率係咪好好？
陳豪與陳茵媺一直恨生女，問追到女兒是否如願以償？陳豪說﹕「絕對係啦！有BB已經係天賜的喜悅，有咗囡囡是上天完美了我的人生！我哋有One big happy family！」女兒的英文名Camilla，他解釋代表高貴、好靚，好似小公主，是好適合女兒的名字，中文名則會跟長輩研究改名。他又稱囡囡似媽咪，好女仔樣，又忍不住讚自己幾個BB也似樣又靚。陳茵媺補充指囡囡好高似爸爸，手腳也特別長，未出世時醫生已指囡囡似模特兒身形，出世時重7.15磅。
B女出世重7.15磅
Camilla是4月27日（周三）出世，陳豪稱兩兒子急不及待到醫院見妹妹了，出乎意料是他們好惜妹妹，想跟她玩。陳茵媺的預產期正是4月27日，BB順產，而且BB也揀了吉時出世；陳豪稱一切自然與順利的。陳茵媺雖然生第3胎，但女兒出世時也忍不住哭，她初時也以為自己會好平靜，但要生孩子時還是好緊張，直至聽到女兒大大聲的喊聲才放心。陳豪自言全程也擔心，每次陪太太入產房也緊張，要相伴一起度過。
陳茵媺﹕唔鍾意「封肚」呢個字
他們婚後三年抱三，兩子一女組五口之家，問陳茵媺是否會唞一唞了？陳豪爽快答「是」，但問陳茵媺是否「封肚」？她則有保留。她說﹕「我唔鍾意呢個字，We are happy now，可以照顧小朋友，之後開始工作了，我一定想返工，但要看工作性質。」
陳豪勁冧﹕仲可以需要啲乜嘢呢
問陳豪終於追到女兒，會否送禮物給太太？他稱會送禮物但未買。他說﹕「我有個Queen，兩個prince，再多個princess，wow，仲可以需要啲乜嘢呢！」陳豪成最感恩與幸福的男人。陳茵媺在母親節前夕添寶貝女獲最好的禮物？她稱無論仔或女，這3年來也有最好的禮物，一家人一齊奮鬥，感覺是團結，好溫暖。
小公主Camilla在陳茵媺的微博曝光，她上載3張女兒的照片，BB肥嘟嘟又熟睡了，她跟囡囡鼻對鼻拍照又惜惜，好溫馨！
記者﹕林蘊兒
攝影﹕鍾偉茵
■更多娛樂猛料 ﹕ol.mingpao.com
