電影《春嬌救志明》票房報捷，香港上畫2日超過360萬港元，昨日（28日）內地開畫票房突破4615萬元人民幣，成績不錯。楊千嬅、梁漢文（Edmond）、林兆霞及陳逸寧昨晚出席廣州《突然想起余春嬌唱游會》活動時，千嬅得知票房成績即失控，與Edmond合唱時，竟然4度喪笑要嗌停，搞到Edmond懷疑自己上了整蠱節目。
千嬅昨晚化身主角「余春嬌」，在台上獻唱多首電影系列出現過的經典歌，更與片中好姊妹「Brenda」林兆霞及「腿張開」陳逸寧組成MKB48，又唱又跳《傳說》，陳逸寧自爆舞步參考自大媽廣場舞。當特別嘉賓梁漢文（Edmond）與千嬅合唱吵架歌《滾》時，千嬅突然在音樂準備響起時說：「其實我哋真係幾勁……」，令Edmond情緒被擾亂，之後千嬅唱錯歌詞，要求重唱，Edmond就大方話他可以再投入過，誰不知樂手們再準備起歌一刻，千嬅似被篤中笑穴，笑到標晒眼水。Edmond惟有忍笑兼拉開話題，希望千嬅盡快平復心情，但她卻笑到踎地，音樂再響起又叫停話未得，Edmond終於反白眼說：「其實係咪整蠱節目？你哋夾埋整蠱我？」千嬅邊笑邊解釋：「好似好尷尬，明明大家太開心……，突然要咁激去嗌交，我要冷靜先！」結果順利完成合唱。
