【肥就唔可以唱歌?】謝安琪為言論致歉:我表達得唔好 (20:52)

文章日期:2017年08月09日

靚媽謝安琪(Kay)正式加盟「生煎王」生意,Kay表示現正忙於湊女及做生意,所以暫緩唱歌,她笑稱:「我仲好肥,唱乜鬼歌,現在生活幾好。」此番說話惹來不少迴響,今晚Kay在facebook貼上與子女張瞻和張靖合照,Kay還嘟起個嘴影相,她連講3次Sorry:「Sorry sorry sorry,需要同大家解釋一下,我唔係覺得肥就唔可以唱歌,我表達得唔好,希望大家唔好介意,我只係覺得自己而家嘅狀態,無論身體狀況,定係身形線條,都同平常工作時候嘅我,有一大段嘅距離,並唔係我心目中嘅演出狀態。

現階段我好享受家庭生活,每日都同我好得意嘅囝囡有好多相處嘅時間,呢啲美好嘅時光對我來講非常寶貴,所以我唔會為咗要工作對此設下一個期限。

而我其實都只不過係啱啱生完妹妹幾個月,我希望可以循序漸進慢慢咁回復狀態,如果有朝一日我返嚟,我希望以最佳嘅狀態同你見面為你唱歌,

一言為定,好嗎? #我不着急 #我現在很快樂」

(即時娛樂)