《同盟》倒數4集大結局，一直玩競猜Big Boss遊戲，昨晚韋爺(郭鋒)跟「Rainman 」正面交鋒，原來她就是金天(江美儀)。不過，「Rainman」不單止一個人，還有一個未曝光。今日監製文偉鴻在facebook特別感激江美儀為保密啞忍，當初他要求《同盟》幕前、後對「Rainman」的身分「狗咬都唔講得」，今次保密功夫果然做到密密實。
監製寫道：「好喇！終於講得喇！江美儀飾演的Rainman首部曲終於登場。當初我好困擾，要同鮑姐作演技比拼，究竟揾邊個才夠份量？我和創作組搔爆頭時，我提議要找一位女演員，氣質要集高雅美麗與毒辣於一身，我講完都覺得自己揾自己笨，雖然我錢唔多好彩朋友多，梗係揾美儀啦！繼《My盛Lady》打大佬（黃子華）咁成功之後，我好肯定美儀係不二人選，即刻碌盡人情卡找她演出。
演唔係問題，但難為她才是問題，又要人演又要守秘密，面對記者提問又一律無可奉告，最慘仲要硬食死貓畀傳媒朋友誤會，寫成淪為配角，大佬呀，真係默默承受慘過家嫂，所以話跟本唔係友情演出，簡直係義氣擔當，豪畀我！」
他預告《同盟》上演江美儀跟鮑姐正面交鋒的重量級戲碼，拍攝時鮑姐多次跟美儀說:「我真係被你呢個Rainman激到生蝦咁跳！」能令見慣大場面的令熊也禁不住燥動，你話Rainman有幾毒！請大家密切留意！
