職場教室:Jumpy CV的問題

文章日期:2018年12月14日

【明報專訊】「Son姐,如果遇到無膊頭、小人長戚戚嘅上司,有事完全推畀個下屬;自己team開會,係威係勢,去到同其他team爭取嘢就成隻龜;開會無效率,每日兩個鐘講是非講無聊嘢。咁嘅情况,走係最明智,對嗎?但都係自己有眼無珠。去見工,成日畀人話我CV jumpy唔stable。點解HR佢哋唔會諗一個有勇氣向外闖,接受新事物和改變的人,都會有好處?會比做十年同一份工好?同埋,跟慣外國人上司,真係好難跟返本地人。Son姐謝謝你,如果你有輔導班,我會join!」

就以上問題,讀者有以下回應:「好多舊思維嘅『腦細』同HR白癡到一個點,以為做得耐叫好!其實做得耐嗰班九成係一間公司嘅毒瘤,搞到啲好員工做一陣唔對路要走!」坦白講,我們的確以員工是否做得長每一份工,去判斷求職者是否有耐性及決心做好工作,可以信賴付託。因為以前不管什麼工種工作,都是要靠時間累積經驗人脈。所以如果好似走馬燈,份工做一陣就走,根本打不穩基礎上不了手。對jumpy求職者避之則吉,怕中伏白費心機,反正大把求職者等工做,當然會左揀右揀。但今時今日還抱着公司請人佔上風這種思維,除了講句沒有與時並進,還要加句賠了夫人又折兵。只嘆有料有見識見地的老闆和HR,為數太少。

反省轉工原因找新出路

言歸正傳,回答你的問題。以你的情况來看,jumpy CV其實不是最大問題,問題是究竟你每一次轉工為的是什麼?有沒有好好反思反省,從每一份不成功的工作中汲取教訓?做人還是做事出問題?是工種抑或崗位的問題?如果每一次都因為有眼無珠,你的判斷力就很有問題。或者你一開始,就有錯誤的期望?不斷轉來轉去,還是原地踏步,而不是作嘗試搵興趣找新出路,你只是重蹈覆轍逃避面對現實。這樣的話,無論如何,你走不出自製的死胡同。

公司文化不同 不應比較

大公司架構臃腫複雜冗員多,小公司人少一樣是非多,總之搵份好工談何容易?外國人上司都有衰人,香港人上司都有好人,人夾人緣,不可以一竹篙打一船人。題外話,不少老闆都向我大吐苦水,說請個認真做事的員工下屬甚艱難,真正各有各難。

其實不管什麼國籍,是上司或下屬也好,每間公司的文化,本來就不一樣。對不一樣的性格和處事作風,就要用不一樣的方法態度應付,所以不必更不應作比較。要記住自己的身分角色,就配合什麼方法處理演繹。難聽點講句,又不是被槍指頭逼住要做的,不管什麼理由等錢開飯為勢所迫也好,都要記住永遠是自己的選擇,怨不得任何人。我說的怨,不是說你埋怨,而是心態。仔細想想,就如食中餐用筷子食西餐用刀叉,一開始肯定會有不習慣,但如果認定是麻煩,即使眼前是米芝蓮三星的美食,都不會覺得是享受!

慢慢咀嚼,好好消化,換個角度調整心態,你會看到不一樣的世界。

■Profile

張慧敏(辣媽),獵頭顧問公司老闆,職場專欄作家。

文:張慧敏