職場教室:動物扮工室

文章日期:2019年07月26日

【明報專訊】Corporate Jungle一詞,大家有冇聽過?很多年前,我曾經主持及主講過一個以「How to survive the Corporate Jungle」的講座。不知道今日的讀者群中,可有曾經參加過當日的講座的?

假豬 大智若愚食老虎

既然叫得Jungle,當然虎豹豺狼什麼動物都有。職場行走,知己知彼,如果知道自己交手的合作的是什麼動物的話,便能避免中伏避免陷入險境,被出賣、被利用、傷亡的風險肯定可以大幅減少。正值我有新書出,普天同慶我決定派福利,選幾個性格鮮明的動物,深入淺出為大家講解一下。太陽底下無新事,必定總有三兩款在身邊,歡迎對號入座,更歡迎照鏡自省,識得笑,都唔好笑,因為應該笑唔出。

豬:如果你以為豬咁蠢,真正蠢的不是隻豬而是你。豬其實很聰明,不會浪費無謂氣力,不在乎天長地久,只在乎活得happy。首先要知道豬分兩頭路,有真豬和假豬,分不清楚的話就要好好想一想,會不會其實自己才是豬?真豬其實很可愛,天跌落嚟當被冚,你急佢唔急,懶是必然的,不過搵工轉工都一樣懶。因為鍾意食,所以識得投其所好,幾豬都有其積極及可用之處。

但假豬才是真犀利。可以有幾犀利?扮豬可以食老虎,還有大智若愚,內外夾攻,你話犀利唔犀利?防範敵人會打醒十二分精神,以為自己好醒,不把豬仔放在眼內,結果死咗都不知道是豬仔做的好事!

馬:要灑脫不羈做野馬,不甘不願被人騎,首先就要問問自己是否具備野馬的條件和本錢。即是什麼?不貪白糖紅蘿蔔,天地為家自己搵食。要有瓦遮頭住馬廐,又有好草食,天底下沒有免費飯餐,被騎被鞭被策,跑到不能跑為止,有沒有機會返老家頤養天年,就看你曾經跑出過什麼成績。

想話事,就要做馬王,個個都要買你怕。做馬仔,就要恰如其分,即使不懂拍馬屁,都要識做,要聽指令跟住做。千里馬萬中無一,伯樂何嘗不一樣?腳踏實地,做隻出色的馬仔,去到邊都有容身之處。

鱷魚 反轉肚皮是手袋

老虎:老虎看似很兇狠,其實本身屬貓科!如果唔發惡,老虎只不過是病貓一隻。張牙舞爪得把聲,唔知嚇死知就笑死,一個唔覺意,被隻豬食埋。講開又講其實鱷魚亦一樣,鱷魚頭老襯底,表面無堅不摧,肚皮卻脆弱不堪一擊,反轉肚皮是手袋。明槍易躲暗箭難防,老虎其實不嗜殺,殺戮只是為生存。食飽就會懶洋洋曬太陽,除非蠢到與虎謀皮,否則老虎之嘛,使乜驚?

鸚鵡:鸚鵡學舌,人講佢又講,不求甚解,只求發聲。初來報到幾得意,但鸚鵡學舌講來講去得幾句,自我感覺良好以為識講嘢好叻好好笑,其實除了他的主人其他人一點都不覺得好笑,吱吱喳喳只會煩到無朋友。煩都算,還要口沒遮攔兼無腦,聽到乜嘢講乜嘢,慘在學又學唔足,講啲唔講啲,乞人憎到冇朋友。但最重要是養唔熟,即使照顧幾好衣食幾足都不會知足,總是在伺機逃走,一有機會頭也不回走夾唔唞,不會有留戀。

如果老闆係動物,大家會用什麼動物來形容呢?

■Profile

張慧敏(辣媽),獵頭顧問公司老闆,職場專欄作家。

文:張慧敏