【網絡熱話】動物傳心師「解讀」假龜照片變熱話 網民反應兩極

文章日期:2017年07月11日

喜歡養動物的主人,都希望明白寵物的心思,了解牠們為何悶悶不樂或不肯吃飯……近日《有線電視》節目「新聞刺針」邀請動物傳心師尋找走失的「烏龜」(布歐),試圖透過照片以傳心術尋找其位置,結果5名受訪的動物傳心師,「解讀」布歐的位置和走失原因各有不同,節目最終公開布歐只是玩具龜,事件引起網民熱烈討論。

不少網民在facebook、討論區等對動物傳心師解讀竉物心事反應兩極,有網民認為動物傳心沒有根據,認為是「另類神棍」、「同祈福黨同一道理,你信乜就自然被咩呃」。不過,有網民卻認為「信則有不信則無」,亦有網民分享曾帶寵物跟動物傳心師「傾心事」後解決問題:「姐姐(動物傳心師)本來唔識我地一家,但係可以講晒兩位小朋友(貓貓)嘅性格特質,連我地做過嘅事都可以講到出黎。」

另外,有網民惡搞上載油雞美食照片兼留言問:「真心求有料傳心師,幫手傾傾……隻油雞有咩心願未了。」吸引逾3000個讚好及哈哈笑回應。

以下是部分網民反應:

Ivan Lau:以前d傳心師,係本身對動物好了解,響觀察動物行為,再同動物互動,明白動物想法後,再表達番比個主人。而家已經發展到又量子又超時空又問晒米,仲睇相都得,厲害厲害。

Franklin Yao:借人心理搵錢,見得少咩?同祈福黨同一道理,你信乜就自然被咩呃。

古藍:如果動物得,人都得啦,你黎(嚟)傳下心。

Lo Chi Kin:點解唔吹大啲話其實玩具都有生命,你睇下toy story。

Anna Lui:同「問米」一樣,永遠冇答案!一個願打、一個願捱,其實唔影響到其他人。

Snap:其實記者都好公平,比(畀)幾位傳心師解畫,但係聽完大家認唔認同咪各自定斷囉,用咁科學既(嘅)方法去試驗,係有真實力既(嘅)唔洗驚WOR,係神棍既(嘅)咪高下立見囉。

Emma Chan:我自己一向都唔buy 呢樣野。但呢d野都你願買,我願賣,信則有不信則冇,佢地又冇做d惡事傷害人,你咁試探人,仲指名道姓咁陷害人,好過份我覺得。

文:黃廷希 thwong02@mingpao.com

更多Hot Pick:link.mingpao.com/43932.htm