【給東華主席王賢誌的話】汪明荃:做騷同做慈善一線之差 (22:43)

文章日期:2019年02月24日

汪明荃(阿姐)前晚演出東華三院的《誌友共聚 慈善音樂會》後,在社交網上載與即將卸任的東華三院主席王賢誌(Vinci)合照,並撰寫長文說要給王賢誌主席的一番話。當中提到王賢誌常說「碌人情卡」請藝人助陣,她則認為「做Show同做慈善係一線之差」。

阿姐撰文內容如下:「眨吓眼,一年嘞。上年差唔多呢個時間,我喺Vinci嘅就職禮,講過希望佢喺東華主席呢個崗位上面,可以盡情發揮;今次大會再邀請我出席Vinci任內最後一個大型活動,

我都好想知道,上任一年,佢到底有冇辜負大家嘅期望。所以,我都做咗啲功課,上網搵吓關於Vinci上年工作嘅報導。

我發現,短短一年,佢參與過嘅活動真係好多,幾乎每個月都有十幾個,可想而知,佢真係相當勤力,而佢呢一年對東華有乜嘢貢獻,推動過幾多項目,呢啲資料,大家睇返東華網頁或者年報,相信都會知得一清二楚。

不過,翻查報導嗰陣,我發現有4個字,總係經常出現,就係:『碌.人.情.卡』! 佢舉辦嘅活動,大部份都好似今晚咁:星光熠熠!幾乎任何藝人都請得到,令到呢一年東華嘅活動,得到坊間好多關注,而東華籌到嘅善款,亦再創新高。好多人,都會覺得你呢張人情卡真係威到盡!

不過,呢張人情卡之所以能夠碌到咁多人撐東華,你喺演藝界儲返嚟嘅人脈關係當然重要,但係希望你都記得,要感激返你家族建立嘅慈善網絡、東華三院過百年建立嘅基業、同埋呢一年,你講一句,之後就幫你衝鋒陷陣、捱更抵夜嘅東華團隊,有佢哋做你嘅後盾,你呢張人情卡,先至可以咁有份量,令你得到咁光輝嘅成績!

仲有,做Show同做慈善,其實係一線之差。做Show,只係希望大家留意台前嘅表演者;做慈善,係想大家關心背後嘅受惠者。所以,如果你今年嘅努力,只係令大家記得Vinci碌咗好多巨星嚟做Show,我覺得未算成功;但係,如果你嘅努力係觸發到大家支持東華,幫助到真正有需要嘅人,我覺得咁先算得上係圓滿!

Vinci,即將卸任喇,今年相信你喺東華都學咗好多嘢,希望你帶住呢啲經驗,向下一個目標出發!繼續努力,加油!」

(即時娛樂)

明報影片