【謝安琪耳機失靈】張繼聰讚老婆夠堅:經歷用來強化自己 (15:00)

文章日期:2019年03月13日

謝安琪(Kay)今日42歲生日,昨晚生日前夕Kay出席一個音樂頒獎禮,豈料演出期間遇上耳機失靈,雖然最後執生成功,但她直言也感徬徨,返回後台時更忍不住落淚,而Kay老公張繼聰今日凌晨在社交網留言撐老婆,並安慰對方:「災難係堅嘅,不過我認為你更堅。」

相關新聞:【要靠讀唇】演出期間耳機失靈 謝安琪感徬徨落台即喊 

張繼聰instagram長文如下:

「知道你為咗依(呢)個演出,花咗無數嘅心血去練習再練習,希望做到最好。可惜Live performance永遠有無限嘅意外會發生,而今次發生嘅意外,係歌手最恐懼嘅一種...耳機失靈 Sub stage 冇台mon,整個表演聽唔到自己把聲,聽唔到音樂聲...只係聽到耳機嘅沙沙聲,同觀眾席音響彈番嚟嘅聲(會展咁大,我估回音會唔止一浸),現場有幾千名觀眾,唔喺現場嘅更有數唔到咁多嘅觀眾....依(呢)種情境,任何表演者發夢遇到都保證會嚇醒,不過,可惜,今次單嘢係堅嘅。

依(呢)二十分鐘嘅痛苦,恐懼,㥬(徬)惶,心血白費...對表演者嚟講,係災難。災難係堅嘅,不過我認為你更堅,咁嘅環境,你仍然奮力完成整個演出,冇放棄任何一粒音任何一個小節,The Show Must Go On,係一個表演者嘅專業。個騷你唔止go on,仲充滿勇氣咁完成,同埋,如果唔係經過咁充足嘅練習,一定冇可能做到,一定冇可能。

大佬,聽唔到聲照唱,部琴冇聲照彈,聽唔到音樂數唔到拍子照入歌喎,真係靠心中有劍,長篇大論,唔係因為我地(哋)嘅關係,而係大家都係表演者,所以好明白你經歷咗咩。

意外冇人想嘅,不過你好叻,有d(啲)叻係要係危困當中先會展現出嚟。同埋今次之後,可以更加膽生毛啦,上到台冇嘢驚㗎啦,經歷係用嚟強化自己嘅。

312,個宇宙預早送依(呢)份禮物俾(畀)你,等你再Level Up,算係咁啦...最後最後...Happy Birthday My Lady 313 ❤️」

而Kay今午亦在facebook對昨晚的表演發表感受:「孤躪跚獨挺 誰如影隨形 打落門牙和血吞 為表演者的責任 難得的 慶生賀禮 彌足珍貴 受教 感謝 由昨晚到現在 以各種形式 向我支持問候的每一位 流過的眼淚都熱䁔了。」

(即時娛樂)

明報影片