開玩笑想攞許志安9月紅館檔期 杜汶澤:出幾錢都畀 (16:45)

文章日期:2019年04月17日

杜汶澤(阿澤)與同門「小鮮肉」楊天宇昨晚為代言的男士健膚品牌宣傳,由於日頭驚爆許志安與黃心穎車廂激吻事件,阿澤台上少不免抽水,他語帶相關說:「我鍾意下廚煮嘢食,做廚房佬成日偷食,偷食完,攞張濕紙巾抹嘴,抹完乾淨晒,大步檻過,就無事啦!」據知許志安因醜聞宣布暫時停工,9月紅館個唱未知會否取消,現場播出的廣告見到阿澤唱歌,台下起哄要求他即場獻唱,阿澤笑言:「我想上紅館唱,本來9月有人開騷,若果9月紅館檔期,能夠攞到,我出幾錢都畀!」

阿澤受訪時被問到安仔事件時,他說:「我跟心穎家姐心美熟啲。(心美的Ig被網民轟炸大鬧?)蔡一智慘啲,他都在IG被人鬧,不過呢個蔡一智又係嘅,大家有無睇清楚㗎,根本認錯人,相入面嗰個蔡一智嚟㗎!咁黑!睇清楚啲,哈哈﹗(遇「飛來蜢」如何招架?)我不受歡迎,不擔心這些問題,老婆一向好放心,而且我去邊都會向老婆匯報的。」

(即時娛樂)