【入行55周年】尹飛燕6月開演唱會 阮兆輝阮德鏘齊撐場 (17:28)

文章日期:2019年05月01日

【今日直擊】粵劇名伶尹飛燕將於6月舉行入行55周年演唱會,前夫阮兆輝及兒子阮德鏘屆時上台演出外,歐錦棠亦會表演一曲。阮德鏘表示:「我們被不同劇團僱用,我通常同爸爸打對台,每次爸爸話這套戲做得好,快些過來睇、要學,我就話好,但在對面演出緊!其實同類合作有試過,我們剛剛在新加坡開過演唱會,其實傾了幾年,但大家時間檔期配合不同,我亦有帶囡囡一齊去,順便圓了戲迷心願,大家好想見我個女。(今次是將新加坡演唱會原整搬過來?)原本想搬過來再做,不過有好多新加坡戲迷來香港再睇,問會不會有曲目改變,加上媽咪想唱以前出過唱片的曲目。」

至於跟父母是否經常操曲?阮兆輝說:「好少,平日好少坐埋一齊。」阮德鏘指行內多了製作,三人不是經常碰到。阮兆輝就爆大家住隔離座,可是成日見不到面,因為大家都好忙。尹飛燕亦說:「輝哥是當紅,一早起身就做到夜晚,無辦法可以搵到他,所以我搵佢時都要靠個仔。」

尹飛燕坦言今次為了演出,三人會操幾次曲的,因為心情緊張,已有好幾年無搞演唱會,「又想有些東西給大家睇,有些特別的,想做些自己喜歡又開心的事,同時大家又有發揮機會。」阮德鏘笑媽咪無考慮商業元素,只會唱大家喜歡聽的曲目,尹飛燕表示:「現在商業好難講,你話好的,又無人睇,睇劇本不知是什麼的劇情,但又會滿晒座,是預料不到,口味不同。」

(即時娛樂)