轟彭浩翔傷害香港人感情 杜汶澤爆粗:我絕對唔會原諒你 (23:51)

文章日期:2019年08月06日

曾拍過《低俗喜劇》﹑《香港仔》和《志明與春嬌》等電影的導演彭浩翔,今午在微博轉發「護旗手」內容,並自稱「我是護旗手」,獲內地網民激讚,但香港網民直言感失望。曾跟彭浩翔合作過的杜汶澤,今晚在facebook以「每個人一生中總會遇到幾個人渣」為題,不點名爆粗怒斥,阿澤更揚言:「6月以來我最嬲係今日。」

到今晚11時,阿澤再更新facebook留言,強調之前自己沒有開名,令傳媒誤會,阿澤說:「我無鬧其他人,因為嗰班人主要係做大陸人生意嘅,我無意見,亦無感受,亦唔意外。我係X你彭浩翔一個啫!因為你自己投資拍賀歲(片)就標榜自己為香港人而拍,咁X有型?叫人支持本土電影?

響香港同你個出人血饅頭T-shirt嘅兄弟鄒凱光開talk show賺香港人錢!你有乜資格響我面前X王晶呀?王晶至少夠膽講佢唔志在香港市場!好你多多聲!我真係睇住你大睇住你壞呀!XX仔!響呢個時期,你做一樣咁傷害香港人感情嘅事,我絕對唔會原諒你!」

相關新聞:彭浩翔自稱「護旗手」 網民極度失望:會掉晒你嘅書 

鄒凱光今晚亦在fb開live,他意有所指說:「我認為呢個時勢世界,已經非我哋想像,亦唔係我哋表面望到嘅東西,唔係望到係咁就咁,好多嘢我哋冇選擇,正所謂『躺著都中槍』。我自己肯定相信,有啲人突然會180度轉變,係冇理由,係佢決定晒原因,我會選擇理解,講真,當人哋選擇咗人哋選擇,就算我唔尊重,但我會理解,我知點解要咁樣,但係當然大家可以有心態及諗法。嗰個香港市場係咪真係決定離開呀?走呀走呀咁呢?呢個係憂慮咗好耐,再諗啦﹗一單還一單啦﹗我面對嘅嘢唔係好多,但有啲人唔係面對自己,要面對公司同事,或者面對好多商戶品牌,唔係拍枱行咗去,一句我要公義或whatever,然後唔理其他人呢?所以彼此也在捱,總有佢難處,大家理解就理解,唔理解就唔理解。」

(即時娛樂)