【珍惜黐身時刻】細仔一歲生日 李蘊:唔捨得你長大 (12:21)

文章日期:2019年08月08日

李蘊細仔羅明新(小新)今日一歲生日,她聯同老公羅章冠及大女羅紫晞為囝囝慶生,兩公婆超肉緊惜小新,姊姊亦嘟咀送吻,一家四口相當溫馨。

李蘊在社交網有感而發:「8/8今日我個寶貝仔小新一歲啦!一年前今日你好乖自己揀咗個好日子好時辰面世!媽媽只係劇痛咗三個鐘就生咗你出黎(嚟)!(生家姐痛12個鐘)因為你係蠶豆仔加上全母乳,所以黃疸時間比較長!中間又見醫生又抽血,媽媽見到你咁細隻手仔比姑娘拮咁多次都好心痛!好彩到兩個月完全退黃!

雖然係第二胎,好多嘢之前都同家姐經歷過,但每個月見到你學識一啲新嘢我都仲係好似第一次做媽媽咁興奮!雖然你一歲都仲係周圍爬未識行(家姐一歲就自己行)但係你已經好叻仔,見你每日都有進步!牙牙學語!我哋全家人都會陪你慢慢成長!唔使急㗎

我成日都話有家姐的弟弟像個寶!晞晞對細佬真係十分愛護有加同禮讓!作為媽媽見到咁樣,真係覺得前世可能做咗好多好事,今世生到一對咁乖咁可愛嘅寶貝 我好感恩!

由於你係男仔,痴(黐)住媽媽嘅時間只係頭幾年,比起女仔,男仔會比較快獨立同埋好快就會有自己圈子自己朋友,所以我好珍惜你而(依)家痴(黐)我嗲我嘅每一刻!特別係餵奶嘅時候,相信係呢一世我同你關係最親密最甜蜜嘅時候!仔~我已經唔捨得你戒奶唔捨得你長大!不過人總要向前看!

今日你一歲啦!媽媽祝你生日快樂 身體健康!開心成長!爸爸媽媽會盡能力比你同家姐最好嘅成長環境同平等嘅愛!你乖乖哋同家姐繼續融洽相處就得啦!I LOVE YOU SO MUCH我的前世情人!」

(即時娛樂)