【難得好對手】Sing撐祖兒險被搞喊 千嬅:唔like唔會嚟 (15:27)

文章日期:2019年08月08日

容祖兒昨晚(7日)舉行第三場紅館個唱,請來被視為樂壇競爭對手的楊千嬅做嘉賓。祖兒介紹千嬅出場時表示:「人生像一場競技賽,我的跑道上有很多同我一齊跑的跑手,有一些跑手同你距離特別近,一時你跑快啲,一時我跑快啲,今晚嘉賓佢同我一路跑住,喺我歌唱生涯上,如果我無遇上佢,我未必有這樣的速度跑咁快。今日我同佢雙劍合璧,希望曾經有一刻我都畀過佢好大動力,令佢跑得快啲。希望大家用最大掌聲,歡迎我今晚嘉賓楊千嬅。」

祖兒與千嬅繼而合唱《假如讓我說下去》,千嬅唱完後表示:「多謝你請我來這個20周年party﹗你爭啲整喊我,你依家講嘢叻咗喎,好開心喺工作路上遇到你,我可以見證你每個階段的進步,同埋睇住你一路成熟。作為一個歌手,20年唔長唔短,20年更加係一個女人最緊要時間,我都好感謝你路上畀到好多動力我,以前我哋唔係好多機會相處,好多嘢我都冇同你分享過,見面成日都係『Hi』、『Bye』,但係最近10年,大家見面機會多咗,溝通時感受到大家都互相成熟咗,人生路上難得遇到好對手,會令自己進步。所以你唔好多謝我,我應該多謝你先真。好開心分享你這一分鐘成功。」

祖兒全程只在旁聽,一直口啞啞接不上來,最後她笑說:「你睇千嬅真係好勁,佢喺度,我係唔使講嘢……聽講有首歌你都好like,所以我哋特別揀來唱,大家真係要多謝千嬅,唔係佢真係聽唔到呢首歌。」千嬅稱:「我like,唔like我唔會嚟啦!人生就好似連續劇,雖然無人能編自己劇本,但我好開心今晚同祖兒一同編寫這首歌的回憶,送畀大家《連續劇》。」

此外,祖兒昨晚坐飛船升上半空跟山頂觀眾合唱時,竟然發現自己弟弟身處其中,即叫工作人員遞咪給他,開心大叫完成其中一個心願,就是在紅館跟弟弟合唱。

(即時娛樂)