【謹記教誨】 阮浩棕繼承衣缽 誓捍衛嫲嫲梁舜燕名譽 (19:24)

文章日期:2019年08月14日

被稱為「上等人」的資深女藝員梁舜燕(Lily姐)昨日離世,享年90歲。她的孫仔阮浩棕今日傍晚在社交網上載爺爺和嫲嫲的黑白照片,並憶起和嫲嫲的點滴,阮浩棕說:

「小時候睇電視,我知道妳係一個演員。

見到陌生人同妳合照,我知道妳係一個明星。

倍伴妳去做義工服務,我知道妳係一個萬人迷。

踏入社會投身演藝工作,我知道妳係受人愛戴嘅前輩。

但對我嚟講,妳最重要嘅身份(分),係我嘅嫲嫲。

喺妳休養期間,我坐喺病床(牀)邊,一邊握著妳嘅手,一邊陪著妳傾偈。『妳記得我細個果(嗰)陣妳經常放喺嘴邊嘅,係邊句說話嗎?』妳露出慈祥嘅笑容,緩慢咁講:『害人之心不可有,防人之心不可無。』小小嘅一句,大大嘅道理,但嫲嫲妳教會我嘅,遠遠比呢句說話多。

嫲嫲,妳嘅教誨我會銘記於心。喺病床(牀)上妳同我講嘅說話,我會時刻記住。我應承妳嘅事亦會做好,因為我係妳嘅孫,亦因為我繼承咗妳嘅衣缽,所以我會努力捍衛妳嘅名譽。我會一直努力,令係(喺)天國嘅妳可以同爺爺一齊為我感到驕傲。多謝妳係我嘅嫲嫲。妳永遠係我嘅榜樣,係我最好嘅學習對象。多謝妳,我愛妳。

同嫲嫲嘅回憶太多,想講嘅說話亦不能盡錄。只好再次向各位朋友以及傳媒朋友道謝,因為有大家嘅愛戴,先可以成就嫲嫲嘅不朽傳奇。

讓我們永遠懷念香港第一電視女士 — 梁舜燕。

P.S. 雖說過去嘅日子一直做緊心理準備,但係當呢日到來心情依然沉重。家人亦需要好好休息及收拾心情。感激大家嘅慰問,亦抱歉未能一一回覆。

P.P.S. 由入行開始一直希望能夠同嫲嫲妳同爸爸三代人一齊合作,製造我地(哋)阮家嘅代表作,遺憾再無呢個機會。」

(即時娛樂)