【隨時失內地市場】阮民安拒跪低表態愛國:我喺雞蛋呢邊 (16:44)

文章日期:2019年08月27日

阮民安(Tommy)日前參加巿民發起的「香港之路」活動,以及現身荃葵青大遊行,他希望香港人能團結。

今日凌晨Tommy在facebook撰長文,並以「我很窮,我愛人民幣,但我更愛香港」為題,他表示自己支持抗爭運動後,大家對他好好,但同時亦有另一種聲音,揶揄他想靠今次博翻身,又有人窒他「冇嘢輸,有乜所謂」,連回內地掙錢的資格也沒有。

Tommy作出回應:「咁我覺得今次支持運動嘅重點,絕對唔會係放喺自己嘅感受呢個點度,所以我一路都無擺係(喺)心,繼續發聲,繼續每一刻都關注,身體力行支持!

直至琴(噚)日終於發生變化,就係突然間有大班大陸網民不停Cap我Facebook圖(可能呢篇文佢地(哋)都準備Cap,大家可以留言同佢地(哋)say個hi )去我老婆Eva嘅微博,話我地(哋)支持港獨,然後攻擊佢,攻擊我!

咁既然係咁,我不如就一次過喺度將我心底嘅想法,我預計嘅損失同大家分享一下!

自從2012年開始,我就已經擔任住Eva經理人嘅角色,喺幕後為佢打點一切!呢7年入面我地(哋)由兩個個體變成一家四口,一步一腳印,營營役役咁將我地(哋)嘅生意利用網路平台擴展到世界唔同嘅地方,包括日本、台灣、新加坡、馬來西亞、美國,當然唔少得中國大陸!

因為Eva喺微博有大概25萬人follow佢,加埋佢嘅Style,所以喺大陸一路都有好多工作,而喺大陸,我地(哋)嘅工作範圍包括(想清楚一D(啲)可以睇埋下面D(啲)相)幫唔同產品出po宣傳,幫國際品牌官方影宣傳相,Fashion Show,電視台嘉賓,拍綜藝節目,品牌聯乘等,只要我地(哋)繼續好好咁做,唔好講咁多野(嘢),淨係靠呢D(啲)Job已經夠我地(哋)一家四口過唔會太好但亦一定唔差嘅生活!

仲有一樣嘢要講就係:正正嚟緊嘅9月14號,我哋自己第一次投資,EVA嘅自家品牌就會喺東京Laforet正式發佈(布),之後就會全世界發行,而最大嘅入貨地區一定喺大陸,而我地(哋)喺大陸處理品牌發行嘅負責人,係一個大陸最大嘅時裝公司高層(佢公司係帶頭將Undercover全國下架),我地(哋)喺大陸嘅Backup其實好好!

而因為我上年開始做返好多幕前工作,佢已經話要幫我安排上大陸嘅綜藝節目,發展下(吓),賺下(吓)錢!但就唔好喺件事上面表任何態啦,以一個大家認為想翻身嘅我,理應乖乖收聲,甚至表態愛國!

但6月9號之後,見到香港人嘅團結,我已經忍唔住去開始公開表態支持(因為從來都係支持),之後612、71、721等事件,直到今日呢個狀態,您地(哋)估下(吓)我知唔知道高調發聲後將會損失D(啲)咩?

我可能會失去一個龐大嘅大陸市場。咁點解我要咁做?可能係蠢...但其實,係良知!香港依家發生咁大件不公平不公義嘅事,要我為左(咗)賺錢而選擇扮不見不聞,甚至跪低表態愛國,支持警察打香港人,做什麼護旗手,對唔住,我做唔到!

當然對比起每一個手足受傷、犧牲、被捕,都係嗰句,我呢D(啲)損失,算得咩!

我依然相信,香港地靠我哋自己都一定可以撐得翻起自己,點解一定要靠大陸我地(哋)先搵到食,先做到生意,先搵到錢?我唔認為係咁!

雞蛋與高牆,我一定喺雞蛋呢邊!!!香港人加油!共勉之!」

(即時娛樂)