【曾任電台Sales】林盛斌自爆那些年人工暴升10倍 (13:44)

文章日期:2019年12月18日

於電台出身的林盛斌(Bob),近年在影視圈相當吃香,兼且身兼多職,做DJ﹑拍戲﹑拍劇和擔任主持都瓣瓣掂,家庭生活亦十分美滿,與太太育有4名仔女。

Bob昨天在社交網貼相,有感而發憶述初入行時點滴,他說:「我人生第一份工,就係喺電台做Sales。當年我嘅銷售成績,今日回想返,算唔錯,由起初底薪六﹑七千蚊(元),只係短短半年時間,到我離職嘅時候差唔多出緊六﹑七萬一個月,以一個啱啱大學畢業出嚟做嘢嘅死𡃁仔嚟講,直頭係好似人生大贏家咁!

點解我可以做到?因為我好明白一個道理:『我唔係打緊一份工,我係經營緊我嘅生意』,如果你只係當一份工,你得到嘅只係人工;如果你當係自己生意,你得到嘅就係利潤同回報。

當你好重視你盤生意,覺得間公司你都有份嘅時候,你嘅目標、你嘅心態、你嘅想法、你嘅行為,同『只係當自己打份工』會有好大嘅分別,而呢個分別,經過一段日子,就會帶嚟好唔同嘅結果。

所以懇請在座各位,無論你係做緊任何範疇嘅工作,千祈千祈,唔好再當自己只係打份工,你要相信你係經營一盤你都有份嘅生意,日後你所得到嘅,將會超乎你想像咁多! 希望以上所講嘅一小段,可以為你/妳帶嚟少少激勵。」

(即時娛樂)