林子博今日年廿八洗邋遢，他應香港開電視節目邀請，去停車場清洗戰車。林子博透露平日會三更半夜去洗車，形容自己好似去搵「二奶」一樣，「因為平時要等老婆、仔女瞓晒覺先可以去，這種感覺好似搵二奶」。
原來子博從未用電單車接載太太，他說：「大家都話電單車是人包車，始終不太安全，咁一個人有事、好過兩個人有事！」說完他忍不住「啋」了一聲說：「大吉利市，新年流流講啲咁嘅嘢！」
提到過去一年，子博太太患上重病，自己慘食「無情雞」，他說：「大起大落我就只有一個落字，好在大家守望相助。阿仔更加變身暖男，話以後不要零用錢，我有錢就買藥畀媽咪，真係一個好體貼的小朋友。」子博希望過去一年就好似發一場噩夢，現在從噩夢中醒來，希望新一年一切都好，尤其希望太太身體健康。
