施匡翹、蘇慧恩日前接受香港開電視《開工大吉77》訪問，施匡翹表示雖然二人同期派歌，但不存在「自己人打自己人」，還笑言派歌搵命搏：「依家電台都少咗訪問，所以好落力網上拍片宣傳新歌，加上要花時間撲口罩，如非工作，都唔敢亂出街，慳番些物資！」
施匡翹訪問期間，更教師姐蘇慧恩做瑜伽。她指街坊開始認得自己，亦感受到人間有愛：「有一日鄰居拍門，原來是想送口罩畀我哋，感覺好溫暖！依家都成日做瑜伽，希望打好個底子。」
蘇慧恩就說自己買口罩遇上「黑店」，買錯劣質口罩：「我去朋友屋企樓下，見到有口罩賣，幾百蚊但紙咁薄，搞到用唔到！依家都留喺屋企多，同隻貓貓拍片，點知大家鍾意隻貓多過我，睇嚟要捧佢做KOL，賺番啲口罩錢！」
