【選角無錯】梅小青心痛黃心穎毀前途:應給機會 (23:28)

文章日期:2020年03月14日

「金牌監製」梅小青退休作《法證先鋒IV》正在熱播,她接受車淑梅主持的港台節目《舊日的足跡》訪問,回顧其製作生涯,並點評熱播電視劇的選角。

小青姐對於今輯《法證IV》獲得好反應,她感謝所有參演的演員:「 首先多謝四哥(謝賢),我係佢嘅小粉絲,當年去片場搵佢同芳芳姐(蕭芳芳)簽名,但我一直唔認識亦唔敢搵佢,今回我臨別秋波託好朋友開口邀請,佢好快就答應。誰知記者會第二日,四哥打電話畀我話唔做喇,怕辛苦......一下子我嚇傻咗!我好感激拉姑(狄波拉)在旁邊幫口:『應承咗唔可以唔做㗎!』四哥先話:『小青我玩吓你咋!』其實四哥演出非常認真,服裝全出私伙......我哋冇傾片酬,我畀一封利是佢作車馬費,佢初時都唔肯收,總之四哥時刻都散發出一股濃濃嘅星味啦!」

小青姐一向選角條件是要有演員道德,團隊合作亦要開心。問今次是否錯選了黃心穎?她直言不覺:「我喜歡心穎係由《宮心計2深宮計》開始,佢好甜唔造作,嗲亦唔會過火,《法證IV》我早預佢一份,佢熟讀劇本,好快拿揑到我哋要啲乜。可惜發生咗呢個Case(安心事件), 我好意外亦好心痛。」小青姐坦言心穎一定是錯,她本來大有前途,現在受很大的懲罰,並謂生命有take 2,這麼年輕應該再給她機會。從手上三、四個女演員中找來湯洛雯(靚湯)代替心穎的角色,原因小青姐覺得她好甜、好有heart:「我要佢減肥,但似乎唔太成功,於是我同自己講,我揀佢並非因為佢個樣同體重,係因為佢可以做到我劇中嘅角色。佢同心穎唔可以比較,各有各嘅好處,她(靚湯)入組廿幾日就做到呢個成績,我非常滿意!」

小青姐又點名稱讚黃浩然及譚俊彥:「 家豪哥(丈夫劉家豪)好早同我講過浩然好有演員道德, 即使當年只係客串劇集,就算拍攝一啲手腳近鏡,佢都要自己親自返嚟演繹,佢話身體都有語言,我好喜歡佢,佢係新一代演員嘅榜樣!至於譚俊彥,我並非同狄龍係好朋友先揀佢,的確揀佢嘅時候,團隊對佢演包青天印象太深,大家提議揀一個(樣子)寬容啲演員,但我覺得應該畀佢一個機會,搏一搏!」果然他不負眾望,在劇中哭着洗碗那一場戲之後,大家都非常喜歡他。小青姐對於選用譚俊彥表示身同感受,因當年即使有合適的角色也不敢揀選胞妹梅小惠演出,又謂其實小惠的笑戲和喊戲也很到家,姊妹倆也承受很大的壓力!但後來小青姐豁出去,隨後兩劇都選用小惠擔任女主角,又大讚她做得非常好,特別是爸爸看到兩個女兒的名字,同時出現在電視劇中感到非常開心,小青姐就知自己做對了,所以她很明白俊彥的壓力,並盛讚他的能力非常高強。

(即時娛樂)