由火火和KB組成的「雙龍出海Double Dragon」，拍攝ViuTV真人騷《萬人幫拖搞邊科》，下周一晚（6月1日）播出的一集，2人為帶歡樂給一眾「龍友」，現身幫拖求婚送花，並在結婚大日子唱歌助慶，相當落力！
他們在節目中難得展示深情一面，大爆當年求婚浪漫史，KB指求婚過程簡單，在雪地搭住女朋友膊頭一齊自拍，女友在熒幕內見到KB拿着戒指，即緊張叫他：「你唔好跪喺度啊！好多人望住！得喇！」，KB便求婚成功。火火憶述當年因為有小朋友才結婚，但仍希望向老婆表達誠意，當時2人到泰國旅行，火火在牀邊拿着戒指跪低求婚，認真地說：「想你衷心知道，唔係為咗小朋友要你嫁畀我！你可唔可以因為愛我而嫁畀我。」
