【稱「失業中」惹退團疑雲】193自詡高大靚仔轉數快 發展遭ERROR騎呢形象局限 (20:34)

文章日期:2020年06月24日

男子組合ERROR成員193(郭嘉駿)在社交網撰千字文,分享被網民指他唔識跳舞拖累全隊的感受。他坦言當日跟ViuTV簽約時一心想做電視台藝員,可以拍劇及主持節目,也說過他不會再跳舞,後來被安排加入ERROR也欣然接受,希望集合4個人的力量可以走得更快和更遠。

他自言因為以前打波時多次受傷,韌帶撕裂過無數次,又慣性甩骱,接受完手術治療也未能改善易甩骱情況,再加上不會跳舞,所以每次為ERROR排舞時都會獲安排跳較簡單的舞步。193說︰「雖然我好抗拒跳舞,而且跳舞嘅時候膊頭會刺痛,但我都會去做,當係幫人哋完成夢想掛(啩)。」

193質疑︰「其實都做咗三十年人,自己鍾意啲乜同唔鍾意啲乜絕對好清楚。唔鍾意就係唔鍾意,迫都無用。不過如果跳舞係對團隊事業有幫助嘅,我絕對會盡力去做,最多都係斷多次手啫。但我諗深一層,幫到有幾多呢?你識我哋、鍾意我哋,係咪因為我哋跳唱呢?學保錡話齋,成三十歲人又周身傷,唔好搞咁多嘢啦。其實開多個節目俾(畀)我哋做,或者做多幾首歌,會唔會令我哋事業更上一層樓、更多人認識呢?邊樣最有效,心水清嘅ERROR fans應該即刻答到。」

193直指ERROR的騎呢形象局限了他的發展,他自言喜歡時裝,畢業回港後曾在時裝界打滾過一段日子,曾幻想能成為時裝模特兒。他說︰「ERROR局限咗好多嘢,人哋總會覺得我哋騎呢、岩巉、樣衰、搞笑、甚至無腦。喂大佬我喺英國讀心理學㗎,而我自問轉數都幾快而且識講嘢,但無人會搵我去做正經節目,因為我係ERROR。喂我都算高大靚仔丫(吖),岩巉樣衰關我乜事?我亦都好羨慕MIRROR會有唔同嘅時裝品牌搵佢哋好型好chok咁拍廣告,收錢着住時裝品牌嘅衫出event。但我係ERROR,只得我着衫好睇、識fashion係唔夠,因為ERROR係四個人組合。」

他強調從未在鏡頭前怪責、嫌棄過其他人唔靚仔、身形差,因為知道ERROR成軍的時候就是ERROR,一切已注定,他們4個是ERROR而非MIRROR亦有原因。193說︰「為咗團隊好,我一直go with the flow,然後自己瘋狂睇外國綜藝節目,去研究自己角色定位,研究點樣做會引到觀眾笑。因為我知道ERROR做綜藝係會有一番作為,會幫助到我哋四個人嘅事業。而做綜藝出色係唔夠,歌唱事業亦都可以令我哋成為一隊與別不同嘅組合,所以我keep住都有學唱歌,就算幫唔到團隊好多,最起碼都唔會成為團隊負累先。好啦我有啲眼瞓,所以唔想繼續寫落去,總之今晚睇《ERROR自救TV》啦,得返3集咋。之後有排都見我唔到㗎啦,我手頭上嘅工作已經完成哂(晒)。」

最後,193以「失業中的193上」作為文章的下款,引來揣測是否要離隊或跟ViuTV解約。

《明報》向ERROR經理人了解,原來是後生仔抒發感情,由於跳舞是193的弱項,有人鬧他的跳舞表現而一時感觸。至於他提到「失業中」?經理人解釋ERROR其他3位成員最近也有新工作,只有他未有安排,所以他說自己失業,希望公司劇組知道他冇工開,可以分派工作給他。因為他抒發感情令人誤會要離隊或解約,經理人笑說:「解約?佢(193)那有錢解約?」193也向經理人說下次唔講「失業」,講「待業」較合適。

(即時娛樂)

相關字詞﹕郭嘉駿