【破財擋災】經一事長一智 莊思明非常感激香港警察 (12:15)

文章日期:2020年06月30日

莊思明日前拍攝劇集《超能使者》時,其價值約1.5萬元的名牌手袋,在劇組的小巴內被盜,袋內的信用卡被盜用,涉款共約5.7萬元。昨晚莊思明在社交網貼相並派心心,又表示感激香港警察:「呢兩日收到好多電話同messages,我知道好多人都好緊張件事,好多謝大家對我嘅關心,首先我要好多謝《超能使者》劇組演員,工作人員同車長嘅幫忙同協助,多謝大家咁盡力幫我,無言感激!

我亦都非常感激香港警察,多謝你哋可以係(喺)咁短時間之內,就將兩位盜用我信用卡嘅犯人拉咗,衷心多謝你哋嘅努力,辛苦哂(晒),今次係一件好不幸嘅事,希望可以盡快破案查出真兇,最重要係日後唔會再發生類似事件!

經一事長一智,我以後亦會加倍小心自己嘅財物,貴重物品跟身,免得匪徒有機可乘!今次就當係破財擋災,我以後會小心架(㗎)啦,再一次感謝所有幫過我嘅人,多謝大家嘅關心。#財不可以露眼 #小心財物 #早日破案 #咁大個女第一次經歷咁嘅事 #希望可以快d(啲)揾(搵)返個袋 #多謝大家」。

(即時娛樂)