J2音樂訪談節目《我們的音樂時代》，主持許文軒（Edmond）邀請石詠莉（Sukie）擔任嘉賓，談到由組合成員到製作HiFi唱片感受，她說：「2014年我喺谷底想放棄，多得鄧健泓畀信心我，本身想做原創歌，但2010年我試過，亦失敗咗，出咗等於冇出，所以決定做HiFi碟，因為我覺得一個歌手，係應該以聲音行先，而唔係形象同新聞，所以喺HiFi碟中唱一啲大家熟悉嘅歌，令大家可以真真正正咁聽到我把聲，以前組合時期又真係少啲機會畀大家聽到我把聲。」
問到有否覺得因造HiFi碟而成功洗底？她說：「其實最初唔係想自資，因為同過一啲唱片公司傾過，但反應係No，聽到一啲好難聽說話，話唔好幫佢啦，幫佢會唔會影響我哋唱片公司形象㗎，唔好使錢落佢度，做極都做唔起，但因為咁而令我哋慢慢學識點樣做好一張好嘅HiFi唱片，亦畀大家睇到我嘅誠意同用心。以前我好介意喺人哋面前提起石詠莉呢個名，因為個個聽到都會耍手兼擰頭，依家我唔介意，我仲好開心。」
