黎耀祥及陳豪兩位視帝級藝人，近日接受節目《Tiger's Talk》主持人林盛斌（Bob）及伍詠薇訪問。提到最窮的日子，陳豪說：「我做模特兒時代都搵到錢，不過當我有心做演員時，電影圈又不太吃香，開始『冇嘢撈』，試過一年冇工開，完全冇收入，唯有卡數冚卡數，差不多有成10萬元卡數，但我不會問屋企人拎錢。」
黎耀祥慶幸演藝工作由TVB開始，起初有穩定的月薪收入，加上做人量力而為，搵10元只花8元，所以無試過冇飯開的日子。至於榮升視帝後要「萬歲」請客會否覺得肉赤？黎耀祥表示：「如果收工煞科，最多幾萬元，冇乜所謂，大家開心。有位女演員不是成日拍劇，久不久先返來拍劇，有一日外景放午飯，平時普通一間酒樓就算，可是她就搵附近一間名牌酒樓，補了幾千元出來食飯，完全無詐型。（她如此大方應開名？）就是袁詠儀，當年張衛健在舊電視城愛放下幾千元，直接扣數不用次次畀錢埋單，好有型。」
