【計劃生一仔一女】跳舞添情趣 王君馨送驚喜冧老公 (19:31)

文章日期:2020年08月25日

王君馨(Grace)接受許文軒主持的《StarTalk》訪問,暢談做獨立歌手推出新歌感受。Grace表示今次自資6位數字出歌,全部落手落腳,包括作曲、找MV班底、拍攝場地及舞蹈員服裝等,她說:「真係好似生BB咁,特別要多謝陳友,我之前喺教會認識佢,佢二話不說用佢遊艇帶我同導演出海周圍搵沙灘景。今次拍MV前後有太多事發生,拍攝前一星期,我個stylist入院、排舞師排練嗰時暈咗,而其中一位舞蹈員整親膝蓋,我當時真係崩潰,去到沙灘拍攝時,又突然狂風暴雨,自己唯有祈禱,好彩之後突然停雨立即狂拍,非常感恩,真係關關難過關關過。」

談到生育方面,Grace表示一切隨緣,計劃生一男一女,她說:「唔知點解依家冇咁討厭BB,之前覺得小朋友同BB好難溝通,因為唔知佢哋喊係表達乜嘢,似乎呢一兩年慢慢開始ready!」而她跟老公結婚3年,如何維繫關係,Grace說:「情趣就唔好靠男人,我老公唔識畀驚喜,佢係個好簡單嘅人,平時只係返工放工,驚喜等我嚟,我覺得跳舞可以增加情趣。(跳舞畀老公睇?)都會!當然唔使排舞,跳一啲有美感嘅舞就得。」

(即時娛樂)

 

相關字詞﹕王君馨 許文軒 生B 隨緣