【同囝囝Oscar分隔兩地】張艾嘉稱關係未疏遠:佢好獨立 (19:33)

文章日期:2020年10月08日

影后張艾嘉(張姐)日前接受香港開電視主播馬梓軒專訪,分享為楊凡執導的動畫電影聲演的感受,張姐笑言:「其實楊凡叫我做什麼我都做呀,佢叫我契媽,所以契仔叫我做嘢,我點可能say no呢?我同楊凡最開心嘅年代,係以前我住喺佢屋企附近嗰陣,當時佢係攝影師,我發覺佢影啲相好靚,到現時為止,我覺得冇一個導演或攝影師,可以影我影到最靚,除咗楊凡,所以佢永遠都係我嘅No.1!」

疫情期間,張姐一直留在香港,這段時間令她有另一番體會,張姐說:「我覺得我更加認識香港,其實我喺香港住咗30幾年,但過去多數時間都拍緊戲,有時又要出埠,我根本冇真正長時間留喺香港生活,疫情時間留喺香港生活,我開始跑步,然後認識香港好多地方,好多係以前未去過,我發覺香港真係好美麗!」

談及兒子王令塵(Oscar),張姐表示雖然經常與兒子分隔兩地,但彼此關係從未疏遠:「我哋關係不嬲都好親密,雖然佢現時唔喺香港,Oscar一直都好獨立,佢14歲開始,已經唔係成日喺我身邊,佢又喺外地讀書同工作,所以算係幾獨立嘅男仔,我畀Oscar自由發展自己興趣,但同時我都要佢有規矩,特別係禮貌同埋誠實,呢兩樣嘢會對佢要求多啲!」

(即時娛樂)