囡囡百日宴|雨僑曬全家福 撰長文分享新手媽媽感受 (21:00)

文章日期:2020年11月18日

雨僑今年8月為丈夫羅力威誕下女兒Harper,今日一家三口和雨僑父母,到酒店慶祝Harper出世100日,舉行簡單的百日宴,影相留念之餘,雨僑亦在網上撰長文分享升呢做媽媽的感受。

雨僑留言:「Happy 100 Days!最後都係擺唔成先生期待嘅<龍珠>主題百日宴喇😒😂,不過我哋都渡過咗愉快嘅一日,由懷孕後期到初生三個月,半年我無拍過片無寫過任何深入分享,全天侯(候)照顧@harperllov,所以而(依)家點都要長氣一下。

呢一百日佢喊得多,我喊得仲多,由每分每秒都唔知佢喊乜,總之就日喊夜喊,一日嘔濕十幾套衫,鍾意就三日唔屙屎,到知道佢有肚風呀搓肚仔呀,人生目標短到淨係想你捱過一餐奶,唔好三個鐘頭全喊,見到你成條蟮(鱔)咁fing嚟fing去,個肚一定好痛真係好陰功😢。

到而(依)家基本上係我幻想中嘅BB食玩瞓,真係萬水千山,為咗唔好嘈醒對方,總之諗得出嘅都試過晒,包括一個瞓一個匿喺㕑(廚)房抱住,因為㕑(廚)房最遠,最長試過十四五個鐘無離開過我心口,條頸同對手睇完醫師馬上又痛返,媽媽手已經唔理,係媽媽背媽媽膊媽媽全身,無數個夜晚抱住佢望住個天由黑變光,嗰種感覺真係難以形容,但係相信好多媽媽同我一樣,會覺得自己湊係值得,同埋就算有人幫嘅媽咪都唔會舒服太多,可以抱就抱因為佢大個就唔使你抱,望住佢初生細細粒到肥肥白白識笑,真係覺得好幸福。

收到好多百日媽媽問我點算好,以前你問我暗瘡點算毛孔點算,我有10個方法比(畀)到你,新手媽媽嘅辛酸,我真係只可以同你攬住一齊喊,然後咬緊牙關繼續戰鬥。

無論如何,知道好多朋友都係睇咗我嘅分享十多年,我都會繼續同大家分享,尤其今年媽媽們,其實所有人都係好難捱嘅一年,我哋一齊加油💪。

#其實我真係有咁長氣 #唔知有冇人會睇 #唔介意嘅話我每日都有好多嘢想講 #只係過去嗰半年無時間打」

(即時娛樂)