逃獄兄弟|張建聲不滿效果捽走假紋身:痛到皮都甩 (19:48)

文章日期:2020年11月19日

張建聲有份演出的新片《逃獄兄弟》下月上映,今日他在社交平台分享為「刀疤」一角,跟劇組在背後付出不少心思。張建聲留言:「分享一下,其實每次做反派角色,事前準備功(工)夫都要做足功課,反覆數次同導演討論角色造型、性格以及演繹方式等等。就以『刀疤』為例,究竟用咩方法可以同以往我自己演過嘅監獄電影有所不同呢?除咗將頭髮鏟青之外,同劇組商量過後決定去用八個鐘頭做個半身嘅『假紋身』,但出嚟嘅效果唔係我哋所滿意嘅,結果又用咗兩粒鐘用酒精、卸妝油去捽甩返佢,我把口話無事其實痛到皮都甩,呢啲就係鏡頭前面睇唔到嘅畫面,所以希望大家到時多多入場支持下(吓)港產片啦,我哋真係好俾心機做架(㗎),多謝🎬 #逃獄兄弟 #不惜一切 #12月3日上映」

(即時娛樂)