建議檢控要有懲教作用|張瑪莉斥政府抗疫政策漏洞多:離地到有啲離譜 (18:13)

文章日期:2020年12月15日

1975年香港小姐冠軍張瑪莉,昨天在facebook貼片,片長近13分鐘。張瑪莉呼籲疫情期間,大眾不能掉以輕心,一定要做足防疫措施。在片中張瑪莉斥政府離地到離晒譜,她表示會靠自己,又建議政府應該加強檢控,而檢控不只是罰錢,而是要有懲教作用。

張瑪莉說:「做完運動,喺Club(會所)食早餐望報紙,真係張張(報紙)都鬧緊,唔係我鬧,依家好多社區感染,唔同屋邨有事,睇到12月22日先開始酒店隔離,我真係覺得有少少豈有此理。我唔係嗰啲鍾意鬧人的人,但好多國家,好似澳洲已實行幾個月,我哋官員仲慢慢去研究,都唔使研究,有成功例子畀你睇,好似澳門、國內、紐西蘭、澳洲,人哋都做到,我覺得我哋啲漏洞多到簡直係離晒大譜,我覺得大家要好好保護自己。」

張瑪莉亦指政府離地:「我唔係好明,我11月底、12月初都講咗,暫時停一停唔好畀啲人返嚟,就算真係返嚟,入嚟香港,即刻喺機場快啲檢測14日,唔好再出出入入,但最後梗係冇人聽,我哋人微言輕,今年聖誕節冇喇,大家安在家中睇電視,好冇意思,新年更加唔使諗,我諗第4波去到農曆年,如果啲政策係work的話,不過睇到依家完全唔work,我覺得我哋政府好離地,離地到有啲離譜,仲使研究?唔使研究啦,咁多成功例子畀我哋睇,我覺得我哋政府好驕傲,唔係,講政府係唔啱,係裏面有人好驕傲,覺得自己方式得。老實講,我哋唔係第1、2波,係第4波,亦試過清零,究竟問題喺邊度呢?唔針對個問題,唔係我講,係政府請的醫療專家講,會一路『波』落去。

她續說:「我身邊好多朋友因為去外國麻煩啲,好多都返到國內,過晒14天,依家準備過聖誕過年,我哋喺香港嗰批,政府搞乜嘢,搞掂未呀?我哋自己搞掂,香港市民真係乖,值得攞like攞心心,我完全唔約人食飯,次次去到Club,都係一個人食。」

張瑪莉稱:「我哋個個做好晒,700幾個人唱歌跳舞群組感染,網上好多相都睇到,嗰啲唔戴口罩,又超過限聚人數,嗰啲點解唔檢控?我真係唔明,睇咗一張報紙,話要等警察檢控,其他食環及紀律部隊係咪可以幫手?檢控有阻嚇作用,唔好只係罰錢,要有懲教作用係好,如果唔係的話,好多人唔志在錢,以為罰錢就冇事,依家唔係錢問題,係人命問題,啱唔啱呀?」

雖然張瑪莉表示不介意一個人,但問題是不能長時間一個人,始終人是群體生活,她說:「香港人口咁密集,如果政府唔做好防疫措施,真係好弊,唔好靠人哋,靠自己最緊要,唔好掉以輕心……繼續堅強,真心講,我嚟到依家呢個位,我唔靠政府,靠佢危危乎,不如自己做好佢,聖誕節過冬新年盡量減少聚集。」

(即時娛樂)