被封「賤男」|孔德賢「潛水」多日終開腔 拒跟廖慧儀劃清界線 (19:02)

文章日期:2020年12月16日

【今日直擊】落選港姐兼有「狂野空姐」之稱廖慧儀,其前男友Sam本月初墮樓亡,終年27歲。之後廖慧儀和跟她爆緋聞的《#後生仔傾吓偈》孔德賢,雙雙「潛水」未有回應,而孔德賢的Instagram被網民洗版式留言,而他本來有份主持的《勁歌優秀選》亦被換走。

「潛水」一段時間的孔德賢,今天終於蒲頭,出席台慶頒獎禮記者會。孔德賢表示被指「潛水」期間,其實一直拍新劇,至於優秀選主持換人,他解釋原本是他主持,但劇組大晒要繼續拍劇。

談到Ig遭網民洗版「轟炸」,又稱他是「賤男」,孔說:「係呀,其實有好多comments,嗰日我睇新聞見到件事,自己都好唔開心,始終係唔開心嘅事,大家唔想呢件事發生,跟住網民一窩蜂留言,我見到呢啲comments,都會唔開心,都好harsh,我啲朋友及家人都好擔心,見我ig畀人咁樣轟炸,咁我都收拾心情,抖咗幾日拍劇工作。」

問到他跟廖慧儀關係,他說:「都係我之前所講嘅朋友及同事,冇乜特別進一步。(相約去龍脊行山?)我覺得網民好犀利,因為嗰日係同另一個後生仔拍檔Anson行山,上到山好多人,多人到好似行花市,嗰日見唔到廖慧儀,唔知佢係咪同我同一日上嗰座山,我就同男仔行,都有放相喺Ig story。」

事件發生後,有沒有跟廖慧儀聯絡?孔說:「冇,事件發生後,我覺得佢最需要空間及休息,始終係唔開心嘅事,無謂去作太多額外關心。(公司有冇向你『照肺』?)公司有同我了解事件,出咗新聞都打電話畀我,問我件事係點,叫我收拾心情做好自己。(有冇告誡你檢點啲?)唔可以話告誡,佢哋有教導我,我始終係新人,佢哋會教我點樣面對輿論壓力,提醒我之後任何事,無論工作上感情上都要小心。」孔德賢表示目前單身,跟廖慧儀純粹朋友和同事關係。

問到事件曝光後,會否擔心影響星途?他說:「我睇網上報道新聞先知件事,事情未必大家清楚,只有當事人先清楚,大家有唔同意見或Comments,好明白佢哋睇法,令我更加明白到做好自己工作,對得住自己咁就可以慢慢努力返。(成件事好無辜?)呢件事唔開心,冇人想發生,無唔無辜呢樣嘢就...Ummm...唔開心嘅事唔可以用無辜形容,大家無謂再討論咁多,廖慧儀家人和朋友都非常擔心,希望件事告一段落。」

問到是否跟廖慧儀劃清界線?他則說:「無需要,朋友同事真係唔需要特登劃清界線,大家合作過,喺公司見到會打招呼,之前台慶見過,Say咗個Hi,(唔驚?)我唔係諗嗰樣嘢,冇非份之想或其他事,Keep住同事關係。」

相關新聞:疑介入廖慧儀戀情|孔德賢被抽起無份主持《勁歌優秀選》 監製麥鎮東話…

相關新聞:鐵證曝光?|「狂野空姐」廖慧儀被爆跟孔德賢結伴行山

(即時娛樂)