阮小儀為香港開電視主持全新節目《小儀與13型男》，將於今個月26日Boxing Day首播，剛剛她於社交平台預告節目請來其中一位嘉賓，就是樂隊Kolor的主音Sammy（蘇浩才），亦由於跟Sammy合作的緣分，小儀獲得對方度身訂造的節目主題曲。
阮小儀留言：「好啦，等我講少少啦！話説，12月26號Boxing Day嗰晚起，逢星期六晚上11:00，77台香港開電視，就有我新節目<小儀與13型男>！請大家多多支持！呢位男人 @sammysokolor 係我其中一集嘅嘉賓，拍攝當日，咁啱同監製睇節目個opening 畫面兼聽主題音樂⋯⋯嗯，唔知點解，本身個音樂好唔夾成件事，但又未揀到應該選用咩現成音樂去用嘅時候⋯⋯突然靈機一觸⋯⋯咿？貴人咪喺面前囉？咁好嘅樂隊Kolor嘅Sammy喺度，仲唔試吓揾佢尋求協助？？？一問，即答應，仲好快好快收到呢首度身訂造嘅節目主題曲！嘩！一切都好奇妙！多謝Sammy，多謝你做嘉賓之外，仲為我哋創作咗呢首曲！🙏🏻🙏🏻❤️🙏🏻🙏 #小儀與13型男」
