港區國安法|危機感如影隨形 何韻詩更珍惜與家人共聚 (22:02)

文章日期:2020年12月27日

近年不時參與遊行及發聲的何韻詩,今日在社交平台上載帶父母行山的照片,透露自7月港區國安法實施以來,危機感每天也伴隨住自己,身邊的友人也逐一離開。

她說︰「壞時候帶嚟嘅其中一個positive,係令你突然更加乘十地在意你身邊嘅好事情。今年之痴線,可謂前所未見。自從七月國安法後,大家都生活喺各種不安當中。友人逐一離開,走同留都有各種挑戰要面對。到底幾時會有人上門、幾時會俾人拉,危機感每日都伴隨住自己。正確嚟講唔算係恐懼,但心中約莫有數,一種好古怪嘅居安(....?)思危。但正因為有呢種極度不確定,更加令自己珍惜每一刻仍可以同家人朋友相聚嘅時候。」

「回想好多年嘅聖誕都係同一班朋友、做show或者到外地過,今年疫情影響無得周圍去,選擇咗喺Goodea Goomo屋企為佢哋煮聖誕大餐。都係簡單嘅雞啊薯啊包啊咁,但重點不在於食物。最近亦開始帶佢哋去行山,有時亦會相約朋友,山上共同進退。能夠喺最普通嘅日常,強烈地感受到每一刻時光嘅珍貴,呢個感覺從未試過,好神奇,係最大的blessing。」

「好與壞,定義可以好闊,都係相對嘅。如果你嘅人生目標係不斷尋求靈魂上嘅進步,那麼在最不穩定的時候,你都有機會會找到最大嘅快樂。好變態、好老土我知,但係真嘅。邁向2021,我不求好或壞,只願在新一年當中的各種新挑戰,能令你我成長多一些、堅壯多一些、互相珍惜多一些。世界各地嘅大家,好好保重。#2020 #香港」

(即時娛樂)