杜大偉（David）日前首度讓愛妻楊凱琳（Stella）在電視節目上曝光，兩口子同台甜蜜獻sing，大曬廿載情。David入行以來近乎零緋聞，屬圈中罕有專情男，然而最近他再次獲邀拍廣告，在廣告中扮演1970年代爆笑飛哥，大放笑彈。
David與Stella在《流行經典50年》獻唱金曲《只怕不再遇上》，零演出經驗的Stella，雖則非常緊張，幸David又拖又攬傍到實，終能順利過關，David坦言：「老婆真係好緊張，唱歌嗰陣手都震埋，所以我用力拖實佢，等佢冇咁驚，佢唔係唱家班，有咁穩定表現，對我嚟講，已經可畀佢100分。」
提到如何維繫與愛妻甜蜜廿載情？David說：「我哋讀書嗰陣認識，為咗追佢，我會成日湊佢放學，依家就成日湊佢放工，就算幾忙都好，都會爭取時間陪佢。」
